Kirayə evlərin qiyməti ceyran belindədir

Yeni tədris ilinin başlamasına az qalıb. İki həftə sonra ali məktəblər qapılarını tələbələrin üzünə açacaq. Ancaq bəzi tələbələr, xüsusilə də rayondan paytaxta gələnlər hələ də kirayə ev tapa bilməyiblər. Kirayə mənzil bazarında isə qiymətlər od tutub yanır. Rieltorlar 15-20 faizə qədər qiymət artımının olduğunu deyirlər.

Ölkə.Az xezerxeber.com-a istinadən bildirir ki, kirayə evlərin qiyməti ceyran belindədir. Yeni dərs ilinin başlamasına az qalmış qiymətlər artıb.

Ali məktəblərin açılmasına az müddət qalmış kirayə evlərin qiymətində 15-20 faizə qədər artım var.

Mütəxəssislərin sözlərinə görə, kirayə bazarında müşahidə olunan qiymət artımı mövsümi xarakter daşıyır. Hər il yeni dərs ili ərəfəsində bu vəziyyət müşahidə olunur.

Qiymət artımı daha çox, universitet və metro ətrafı rayonlarda yerləşən mənzillərdə müşahidə olunur. Məsələn, "Elmlər akademiyası" metrostansiyası ətrafında yerləşən 1 otaqlı mənzilin qiyməti 300 manat, Əhmədli metro stansiyasının yaxınlığında olan 1 otaqlı evin kirayə qiyməti isə 150 manatdır.

Mütəxəssislərə görə, ilin bütün aylarında mərkəz ilə ətraf ərazilərdə yerləşən evlərin kirayə qiymətində 100-150 manat qiymət fərqi olur.