\"Dollar qıtlığı saxta pulların dövriyyəyə çıxmasına səbəb ola bilər\"

"Adətən nəyinsə qıtlığı yarananda insanlar o qıtlığı müxtəlif yollarla, o cümlədən qanunsuz vasitələrlə aradan qaldırmağa çalışırlar. Son zamanlar ölkədə yaranmış dollar qıtlığı da istisna deyil".

Bu fikirləri Ölkə.Az-a açıqlamasında "Polisə dəstək" İctimai Birliyinin sədri, istefada olan polis polkovniki Şəmsəddin Əliyev səsləndirib. Ş.Əliyev bildirib ki, belə olan halda işbazlar saxta pul satışıyla məşğul ola bilərlər:

"Əslində, dollara bu qədər ehtiyacın olmasında da bir qəribəlik var. Çünki ölkə konstitusiyasında milli valyutamızın manat olduğu göstərilir. Yəni, alış-verişlərin, kreditlərin dollarla verilməsinin özü də qanun pozuntusudur. Məsələn, görürsən ki, banklar krediti manatla verib, indi dollarla geri istəyirlər. Bu kimi hallara nəzarət olunmalıdır".

Xatırladaq ki, son günlər ölkədə dollar qıtlığı yaranıb və əksər banklar dollar satışını dayandırıblar.

İntiqam VALEHOĞLU
Ölkə.Az