Telman İsmayılovun əlindən alınan \"Mardan Palace\"da işçilər aksiyaya başladı

Azərbaycanın tanınmış iş adamlarından Telman İsmayılovun 1.4 milyard dollar xərcləyərək dünya şöhrətli ulduzlarla açılışını etdiyi "Mardan Palace" otelində 160 işçi may ayından bu yana maaş almadıqları üçün aksiyaya başlayıb.

Ölkə.Az xəbər verir ki, Mariah Keri, Riçard Gere, Şeron Ston, Monila Belluçi kimi məşhur simaların iştirak etdiyi 2009-cu ildəki təntənəli açılış mərasimi ilə dillərdən düşməyən "Mərdan Palace" otelində işləyən 800 işçidən 160-ı maaş almadıqları üçün 4 gündür işə çıxmayaraq etiraz başladıblar.

"Devrimci Turizm İşçiləri" Həmkarlar İttifaqının sədri Mustafa Yahyaoğlu aksiyaya qoşulan işçiləri ziyarət edib. Mustafa Yahyaoğlu əmək haqlarının verilməməsi səbəbindən 160 otel əməkdaşının işi dayandırmaq qərarı aldığını bildirib. Hüquqlarını tələb edən işçilərin qanunları pozmamaları üçün onlara tövsiyələr verdiyini deyən Yahyaoğlu, işçilərin otel daxilində oturaraq aksiya keçirdiklərini qeyd edib.

Otelin müştərilərlə dolu olmasına baxmayaraq işçilərin əmək haqlarının ödənmədiyini iddia edən Yahyaoğlu aksiya keçirən otel əməkdaşlarının yerinə gündəlik muzdla çalışan işçilərin cəlb edildiyini vurğulayıb.

Xatırladaq ki, bir müddət öncə borcları səbəbindən icra yolu ilə "Halk Bankası"na satılan "Mardan Palace" otelinin satış tenderinin ləğv edilməsi üçün İsmayılovun vəkilləri məhkəməyə müraciət etmişdi. Məhkəmə şikayət ərizəsini qəbul edib, məhkəmə proseslərinin yaxında başlanılması gözlənilir.

1 milyard 400 milyon dollar xərclənərək ərsəyə gələn "Mardan Palace" 2010-ci ildə dünyanın ən lüks oteli seçilmişdi.

2009-ci ildə fəaliyyətə başlayan "Mardan Palace" otelinin açılışına Paris Hilton, Monika Belluçi və Şeron Ston kimi məşhur simalar gəlmişdi.