"Gənc Jurnalistlər arasında etik davranışların təbliği" layihəsinin açılış mərasimi keçirildi
Azərbaycan Respublikası Prezidenti yanında Gənclər Fondunun maliyyə dəstəyi ilə “Gənc Jurnalistlər arasında etik davranışlarının təbliği – etikjurnalist.az” layihəsinin təqdimat mərasimi keçirilib.
3 sentyabr tarixində baş tutan təqdimat mərasimində layihə iştirakçıları, QHT sədrləri, Kütləvi İnformasiya Vasitələrinin (KİV) rəhbərləri və ictimai xadimlər iştirak ediblər.
Təqdimat mərasimini giriş sözü ilə açan layihə rəhbəri, “azxeber.com” portalının baş direktoru Əfsələddin Ağalarov layihə ilə bağlı məlumat verərək görüləcək işlərdən danışıb:
“Layihəmiz çərçivəsində “etikjurnalist.az” saytını yaratdıq. Bu sayt vasitəsi ilə gənc jurnalistlər, jurnalistikaya marağı olan digər peşə sahiblərinin yazıları müxtəlif zamanlarda dərc ediləcək. Yazılacaq mövzularda həm jurnalistikamızın aktual problemlərindən, həm də mediada, sosial şəbəkələrdəki etik davranışlarla bağlı problemlərə toxunulacaq. Sonda peşəkar jurnalistlərdən ibarət münsiflər heyətinin rəyi ilə 3 ən yaxşı iştirakçı birinci, ikinci, üçüncü yeri bölüşdürəcəklər. Layihənin digər aktiv iştirakçıları isə sertifikatlarımızla təltif ediləcək”.
Ə.Ağalarov tədbir zamanı son illər müxtəlif mətbu orqanlarda jurnalistikanın ən əsas prinsiplərinin pozulması ilə bağlı çoxlu sayda nümunələrlə qarşılaşdıqlarını və bunun birbaşa jurnalist peşəkarlığı ilə əlaqəli olduğunu söyləyib:
“Müxtəlif ekstremal hadisələrdə biz jurnalistlər arasında qeyri-pəşəkarların kifayət qədər olduğunu müşahidə edirik. Xüsusən də, ölkəmizlə bağlı ümummilli məsələlərdə istər sosial şəbəkələrdə təmsil olunan vətəndaş jurnalistləri, istərsə də mediada təmsil olunan və özünü peşəkar adlandıran jurnalistlər arasında bunu görmək mümkündür. Cəbhədə baş verən hadisələri ən birinci nümunə kimi çəkmək olar. Biz məhz bu layihə vasitəsi ilə iştirakçılara jurnalistikanın əsas prinsipləri ilə yanaşı, onlara yazacaqları yazılarda hər zaman Azərbaycançılıq ideologiyasının ən ümdə olmasını aşılayacağıq. Gənc jurnalistlərə ilk növbədə vətəndaşlıq mövqeyinə sahib olduqlarını və dövlətimizin milli maraqlarının hər şeydən öndə gəldiyini anlatmağa çalışacağıq”.
Tədbirdə İctimai Televiziyanın (İTV) departament rəhbəri Anar Yusifoğlu, “Xalq Cəbhəsi” qəzetinin və “baymedia.az” saytının baş redaktoru Elçin Mirzəbəyli, hərbi jurnalist polkovnik-leytenant İbrahim Rüstəmli, “Azxeber.com” portalının baş redaktoru Hacıbəy Heydərli, “7news.az” saytının baş redaktoru Səbuhi Abbasov, “Xalq.az” saytının baş direktoru Zaur Mirzə-zadə, “Editor.az” saytının baş direktoru Fərid Şahbazlı, Türkiyə Universitetləri Məzunları İctimai Birliyinin sədri Çingiz Bayramov, Azərbaycan Gənc Alim, Aspirant və Magistrlər Cəmiyyətinin sədri İlqar Orucov və Gənclər üzrə Təhsil Mərkəzinin rəhbəri Fəxrəddin Həsənzadə çıxış edərək layihə ilə bağlı təkliflərini veriblər. Çıxışçılar sonda iştirakçılara uğurlar arzu ediblər.
Tədbirin sonunda xatirə şəkili çəkdirilib.
Qeyd edək ki, layihə iştirakçıları tərəfindən qələmə alınacaq yazılar “etikjurnalist.az” saytında dərc olunacaq və qaliblər ictimaiyyətə təqdim ediləcək.
