Bakı qışa hazırdır? - "Bakıelektrikşəbəkə"

Bu il ölkə ərazisində, həmçinin Bakıda qışın çox sərt keçəcəyi haqda proqnozlar artıq verilməkdədir

Ölkə.az olaraq "Bakıelektrikşəbək"nin mətbuat katibi Tanrıverdi Mustafayevdən sərt soyuqlarda vətəndaşların işıqsız qalma ehtimalının olub-olmamasını soruşduq. Mətbuat katıbi bildirdi ki, "Bakıelektrikşəbəkə" havaların necə keçməsindən asılı olmayaraq qışa tam olaraq hazırdır.

"Narahatçılığa elə bir əsas yoxdur. Nə qədər tələbat olursa, hamısı ödəniləcək. Bütün qabaqlayıcı tədbirlər həyata keçirilib. Belə ki, paytaxtın dayanıqlı və fasiləsiz elektrik enerji təchizatı təmin olunub, şəbəkədə itkilər minimuma endirilib, ötürücü güclər artırılıb və bütün qəza açılmaları aradan qaldırılıb.

Görülən işlərin ümumi statistikasına gəldikdə isə “Bakıelektrikşəbəkə” ASC-nin fəaliyyəti bərpa edildikdən sonra keçən 8 il ərzində:

- fəaliyyətdə olan 32 ədəd 110 kV-luq yarımstansiyadan 23 ədədi yeni inşa edilib

- 2006-2014-cü illərdə 35 kilovoltluq 62 yarımstansiya inşa olunub

- şəbəkənin güc qəbuletmə və paylama qabiliyyəti 96% artaraq 3048 MVA-dan 5980 MVA-ya çatdırılıb

- texniki itkilərin səviyyəsi 16,98%-dən 8,9 %-ə endirilmiş və şəbəkənin ifrat yüklənməsi halları aradan qaldırılıb

- 2000-dən çox TM, KTM inşa edilmiş və əsaslı təmir olunub

- 391,08 km 110 kV-luq, 2324,04 km 20-35 kV-luq və 2886 km 6-10 kV-luq kabel xətləri çəkilib

- şəhərətrafı kənd və qəsəbələrdə 12100 km-dən çox 0,4 kv-luq hava xətləri müasir tipli özünüdaşıyan izolyasiyalı naqillərlə (ÖİN) tamamilə yenidən qurulub

- elektrik enerjisi haqları üzrə illik yığımın ümumi səviyyəsi 98%-ə çatdırılıb

- işçilərin əmək haqqları 94,2% artırılaraq orta hesabla 608 manata yüksəlib

- dövlət büdcəsinə olan bütün vergi öhdəlikləri 100% yerinə yetirilib

Paytaxtda dairəvi təchizat sistemi yaradılıb ki, bu sistemin tətbiq olunması paylayıcı və ötürücü şəbəkələrinin dayanıqlığını artırr. Bu sistemə daxil olan 110 kV-luq yarımstansiyaların tikintisi investisiya proqramında prioritet yer tutur ki, bu da gələcəkdə paytaxtın elektrik enerjisinə olan tələbatın tam ödənilməsinə zəmanət verəcəkdir.

Hazırda “Bakıelektrikşəbə” ASC-nin Mərkəzi Dispetçer Xidmətində elektrik şəbəkəsinin məsafədən idarə olunmasını təmin edən və ən müasir texnologiya sayılan “SCADA” sistemi fəaliyyət göstəriri ki, bu sistem vasitəsi ilə yüksək gərginlikli yarımstansiyaların və xətlərin məsafədən idarə olunması təmin edilir.

Bütün bu yenidənqurma işləri əsas verir ki, ölkədə qışın nə qədər sərt keçməsindən asılı olmayaraq “Bakıelektrikşəbəkə” ASC istifadəçilərin bütün ehtiyyaclarını ödəməyə hazırdır".

Xatırladaq ki, dekabr qış dövrünün ən sərt keçəcəyi ay olaraq proqnoz edilib.

Fatimə İbrahimova
Ölkə.Az