Olimpiya oyunlarının türk analoqu

Qırğızıstanın İssık-Kul viayətinin Kırçın dərəsində keçirilən II Ümumdünya Köçəri Oyunları Olimpiya oyunlarının analoqudur.

Dünən başlayan yarışlara sentyabrın 8-də son veriləcək.

Ölkə.Az "Anadolu" agentliyinə istinadən xəbər verir ki, Çolpan Ata şəhərindən 40 km. uzaqda, İssık-Kul gölü sahilində keçirilən oyunlar rəngarəngliyi ilə yerli və xarici qonaqların böyük marağına səbəb olub.Yarışlarda Azərbaycan da təmsil olunur.

Burda köçəri həyatını olduğu kimi təsəvvür etmək üçün çadırlar qurulub, döyüş, toy, yas,qonaq qarşılama, gündəlik məişət mərasimlərinin əyani nümayişi qonaqları köçəri həyatının iştirakçısına çevirib.

3 günlük festival Qırğızıstan mədəniyyət, informasiya və turizm naziri Altınbek Maksutovun rəhbərliyi ilə təşkil olunub. Festivalda xüsusi effektlər tarixə virtual səyahət imkanı yaradır. Səhnələşdirilmiş şoularda ölkənin bütün teatrlarından 2 mindən çox aktyor iştirak edib.

Festivalda 23 idman növü üzrə yarışlar keçirilir, kütləvi mədəni tədbirlər, gecə konsertləri, xalq oyunları nümayiş etdirilir. Tədbirə dünyanın 16 ölkəsindən (Azərbaycan, Avstriya, Belarus, Braziliya, Almaniya, Qazaxıstan, Qırğızıstan, Litva, Monqolustan, Rusiya, ABŞ, Tacikistan, Türkmənistan, Türkiyə, Özbəkistan, Fransa, İsveçrə, Cənubi Koreya) 160 idmançı qatılıb.

İlhamə
Ölkə.Az