İran səfiri: “Azərbaycana gələndə işğalçı ölkələrin nəzarətində olan media qurumları fəaliyyət göstərirdi”
“Azərbaycana yeni səfir təyin olunanda, burada “üçüncü” işğalçı ölkələrin nəzarətində olan media qurumları fəaliyyət göstərirdi. Həmin media orqanları İran-Azərbaycan münasibətlərinin əleyhinə iş aparırdılar”.
Ölkə.Az saytının məlumatına görə, bu fikirləri İranın Azərbaycandakı səfiri Möhsün Pakayin diplomatik fəaliyyətinin başa çatması münasibətilə Azərbaycan Mətbuat Şurasında keçirdiyi görüş zamanı bildirib.
M.Pakayin deyib ki, həmin media orqanları işğlçı ölkələrin tapşırıqları ilə hərəkət ediblər:
“Ancaq mən Azərbaycana səfir təyin olunandan sonra iki ölkənin dostluğuna xələl gətirmək istəyən məlumtların artmaması üçün əlimdən gələni edirdim, media ilə sıx əməkdaşlıq qururdum və sairə. Bütün bunların sayəsində Azərbaycan mediası İranla bağlı reallıqlardan məlumatlı oldu.
Bundan başaqa, fəaliyyətim dövründə 10-dan çox media təmsilçisinin İrana səfəri təşkil olunub. Bu gün Azərbaycan və İranın bir sıra media orqanlarının ölklərimizdə nümayəndəlikləri fəaliyyət göstərir. Bu əməkdaşlığı daha da genişləndirmək lazımdır və inanıram ki, gələcəkdə də davam etdiriləcək”.
Diplomat qeyd edib ki, indi dünyada siyasi diplomatiya ilə yanaşı, media ilə fəaliyyət də əvəzsiz rol oynayır:
“Bu gün media dünyada sülhün bərqərar olması üçün əvəzsiz rola malikdir. Çox yaxşı haldır ki, bu gün Azərbaycan və İran arasında çox yaxşı dostluq münasibətləri var. Bu münasibətlərin qurulmasında isə medianın rolu böyükdür”.
Səfir Azərbaycan mediasına da təşəkkür də edib:
“Azərbaycan mediasının İranın sülhməqsədli nüvə fəaliyyəti ilə bağlı mövqeyi bizi qane edir. Buna görə Azərbaycan mediasına təşəkkür edirəm. Öz növbəsində İran da Dağlıq Qarabağ problemi ilə əlaqədar Azərbaycanın ərazi bütövlüyünü dəstəkləyir”.
Zaur Əziz
