ABŞ: PYD-ni dəstəkləməyə davam edəcəyik

ABŞ Dövlət Departamentinin mətbuat katibi Mark Toner PKK-nın Suriya qanadı PYD-ni dəstəkləməyə davam edəcəklərini bəyan edib.

Ölkə.Az Türkiyə mətbuatına istinadən xəbər verir ki, Mark Toner mətbuat konfransında bildirib ki, Amerika PYD ilə bağlı əvvəlki mövqeyini qoruyub saxlayır.

"Bu məsələ ilə bağlı biz müntəzəm olaraq Türkiyə tərəfi ilə danışıqlar aparırıq. Bununla birlikdə, "Fərat qalxanı" əməliyyatı çərçivəsində Türkiyənin öz sərhədlərini etibarlı hala gətirməsi üçün atdığı addımları dəstəkləyirik",- deyə Toner vurğulayıb.

O, eyni zamanda bildirib ki, Amerika Bəşər Əsədi qanuni bir lider olaraq görmür. O bildirib ki, Suriyanın gələcəyinə suriyalılar qərar verəcək.

"Cenevrədəki müzakirə müddəti çox önəmlidir. Bizə görə Əsəd Suriyanın lideri olmaq hüququnu itirib, lakin buna yenə də suriyalılar qərar verməlidir",- deyə Dövlət departamentinin sözçüsü əlavə edib.

Qeyd edək ki, Türkiyənin milli müdafiə naziri Işık ABŞ müdafiə naziri Eş Karter ilə Londonda keçirilən görüşün ardınca jurnalistlərə verdiyi müsahibəsində bildirmişdi:

"Türkiyə Rakka əməliyyatını dəstəkləyir. Lakin PYD bu əməliyyatları fürsət bilib yeni yerlər ələ keçirməməlidir, Ankara buna yol verə bilməz. İŞİD-in paytaxtı sayılan Rakkanın azad edilməsində Azad Suriya Ordusu da iştirak edəcək".

İlhamə
Ölkə.Az