YAP-çı deputat “Azadlıq” qəzetinə olan 70 min borcun yaranma səbəbini açıqladı
“Qasid” Açıq Səhmdar Cəmiyyətinin (ASC) sədri, Milli Məclisin deputatı Mirkazım Kazımov “Azadlıq” qəzetinə yaranan 70 min manat borcu ilə bağlı məsələyə aydınlıq gətirib.
M.Kazımov Ölkə.Az saytına açıqlamasında bildirib ki, “Azadlıq” qəzetinin pulu mənimsənilməyib:
“Bu qəzet üç ildir ki, mənim haqqımda yazır, fotomu da ora yapışdırır. Borcla bağlı “Azadlıq” qəzeti mitinq də keçirib. Həmin vaxtı mən onlara bildirdim ki, bu borcun yaranmasında günahkar mən deyiləm. Bu borc mənə görə yaranmayıb. Borc şəhərdə abadlıq işləri aparıldığı üçün yaranıb. Çünki şəhərdə abadlıq işləri yaradıldığı üçün bizə aid olan köşklər yığışdırılıb. Bunun nəticəsində də bizim “Azadlıq” qəzetinə 70 min borcumuz yaranıb. Bu borc tərəflərin yoxlaması ilə sənədləşdirilib.
Çalışacağıq ki, bu borcu imkan olan kimi ödəyək. Ancaq sonradan vəziyyət pisləşdi və hazırda “Qasid” ASC bağlanmaq üzrədir. İndi “Qasid” cəmiyyəti böhran keçirir. Hazırda bizim 50-yə yaxın köşkümüz qalır ki, onların da fəaliyyəti demək olar ki, yoxdur. Bu köşklər ucqar yerlərdə olduğu üçün, orada qəzet satılmır”.
Deputat vaxtilə “Azadlıq” qəzetinə borcun ödənilməsi ilə bağlı sərfəli təklif də edildiyini söyləyib:
“Çox təəssüf ki, “Azadlıq” qəzeti vaxtilə bizim verdiyim təkliflərlə razılaşmayıb. Biz onlara təklif etdik ki, siz qəzetlərinizi bizim köşklərə də verin, biz də onu satdıqca faizi götürməyək, əvəzində sizə olan borcumuzdan çıxılsın. Ancaq onlar bu təkliflə razılaşmayıb bizə qəzet vermədilər. İndi də mənim fotomu qəzetə yapışdıraraq, yazırlar ki, guya mən onların 70 min manatını mənimsəmişəm. Halbuki mən onların pullarını mənimsəməmişəm. Sadəcə olaraq borc yaranıb, bizim cəmiyyət isə bu borcu qaytara bilmir”.
Xatırladaq ki, “Azadlıq” qəzeti YAP Siyasi Şurasının üzvü, deputat Mirkazım Kazımovun rəhbərlik etdiyi “Qasid” firmasını qəzetə olan 70 min manat borcu ödəməməkdə ittiham edir.
Zaur Əziz
