“Pokemon Go” yarım milyard dollar qazanıb
“Pokemon Go” oyunu iki ay ərzində 500 milyon dollar gəlir əldə edib.
Bu barədə “App Annie” şirkətinin analitik hesabatında bildirilir.
İlin sonuna qədər oyunçuların yeni oyuna 1 milyard dollar xərcləyəcəyi gözlənilir.
“Pokemon Go” digər oyunlarla müqayisədə istifadəsinə görə rekord həddə çatıb. Belə ki, “Candy Crush Saga” bu cür məbləği 200 günə, “Clash of Clans and Puzzle & Dragons” isə 400 günə toplayıb.
Qeyd edək ki, “Pokemon Go” iyulun 6-da internetə buraxılıb. Qısa müddətdə bütün dünyaya yayılan oyunu artıq İran, İndoneziya və Malayziya qadağan edib, bəzi ölkələr isə bu populyarlığı biznesə çevirməyin yollarını düşünür. Belə ki, Sinqapurda pokemon ovçularına şəxsi sürücü xidməti təklif edilir. Sürücü ilə avtomobilin kirayəsi 22 dollara başa gəlir. (qafqazinfo)
