AXCP sədri Razi Nurullayev Azərbaycan xalqını təbrik etdi
“Xalqın dəstəyi olmadan Azərbaycanda istədiyimiz dəyişikliyə nail ola bilmərik”.
“Əziz millətim! Müqəddəs Qurban bayramı münasibətilə sizi ürəkdən təbrik edir və xoş əhvali-ruhuyyə arzulayıram. Arzum budur ki, qurbanlarınız uca Allahın dərgahında qəbul edilsin. Qoy, niyyətləriniz qəbul, arzularınız çin olsun. Allahdan sizə xoş gün, rahat həyat və bol sevincli günlər diləyirəm”.
Ölkə.Az xəbər verir ki, Azərbaycan Xalq Cəbhəsi Partiyasının (AXCP) sədri Razi Nurullayev Azərbaycan xalqını Qurban bayramı münasibətiylə təbrik edib. Partiyas sədri təbrikində ölkədəki spsial-iqtisadi duruma da diqqət çəkib:
“Əziz xalqım! Bu təbriki yazan zaman bir çoxlarınızın qurban kəsmək imkanları olmadığını da bilirəm. Bir çoxlarınızın bir tikə çörəyə möhtac olduğunun, işsizlik burulğanında boğulduğunun və bayram əhvali-ruhiyyəsinin də olmamasının fərqindəyəm. Hazırkı ağır sosial durum, bahalaşmanın davam etməsi, qiymətlərin əlçatmaz olması hər kəsi dərin bir böhrana soxmuşdur.
Biz hökumətin yaratdığı və öhdəsindən gələ bilmədiyi bu duruma etiraz edir və onların siyasətini qamçılayırıq. Əfsus ki, bundan artığını etmək iqtidarında deyilik. Xalqla müxalifət arasında da bir uçurum yaranıb və biz təkbaşına xalqın dəstəyi olmadan Azərbaycanda istədiyimiz dəyişikliyə nail ola bilmərik”.
“Amma, biz inanırıq ki, hər qaranlıq gecənin işıqlı bir gündüzü var” deyən Razi Nurullayev inandığını bildirib ki, o işıqlı gündüz, o günəş Azərbaycanın qaranlıq küçələrinə doğacaq və xalq layiq olduğu həyatına qovuşacaq:
“Bunun üçün xalq ilə müxalifət arasında sıx əlaqəyə, inama və birgə fəaliyyətə ehtiyac var. İnam olmadan, hərəkətlilik olmadan dəyişikliklərin də ömrü uzanır. Biz fərqindəyik ki, günbəgün artan qiymətlər sizlərin cibini boşaldır. Artıq insanlar son ehtiyatlarını xərcləyir, son imkanlarını səfərbər edir. İşsizlik baş alıb gedir. Bizə aydın oldu ki, bu hökumət onilliklər ərzində yatıb və ölkənin ərzaq təhlüksizliyini təmin edə bilməyib. Hər şeyi xaricdən idxal edirik və ona görə də hər şey bahalaşır. Dolların qalxması və manatın ölməsi milləti də öldürüb. İnşallah, çətinliklər arxada qalacaq və biz bu bəla ilə mübarizədə qalib olacağıq.
Əziz xalqım! Sizə xoş həyat, sosial problemlərdən, pulsuzluqldan, işsizlikdən kənar bir həyat aerzulayıram! Bayramınız mübarək!”
