Daha bir beynəlxalq markanın Azərbaycan nümayəndəliyi açıldı

Dünyanın ən məşhur holoqram və təhlükəsizlik sistemləri istehsalçısı, Türkiyənin MTM şirkətinin Azərbaycan nümayəndəliyi üçün rəsmi lisenziya verilib.

Bu haqda Ölkə.az-a MTM-nin Azərbaycan nümayəndəliyinin rəhbəri Rüfət Zeynallı məlumat verib.

Onun sözlərinə görə, MTM holoqram və bütün növ təhlükəsizlik sistemlərinin istehsalı ilə məşğuldur.

"MTM hazırda Türkiyə başda olmaqla bir çox Avropa ölkəsində təhlükəsizlik sistemlərinin quraşdırılması, bu sistemlərə texniki xidməti və digər işləri həyata keçirməkdədir. MTM Türkiyənin ən iri texnika parkı olan TÜBİTAK-ın əhatəsində fəaliyyət göstərir və ölkənin ən böyük dövlət və özəl strukturlarının baş podratçısı, onların texniki sifarişlərini yerinə yetirən şirkətdir. Hazırda sürətli inkişaf dövrünə qədəm qoymuş Azərbaycanda bu şirkətin keyfiyyətli işinə böyük tələbat var. MTM dünyada bir-iki "lazerlə holoqrafik master qəliblər istehsalı texnologiyasını" mənimsəmiş və bunu həyata keçirən şirkətdir. Bütün inkişaf etmiş ölkələrin beynəlxalq mal markaları məhz xüsusi holoqramla buraxıldığından, dünyada ticarət markasına çevrilmək istəyən Azərbaycan şirkətlərinin də bu təcrübəni tətbiq etməsinə böyük ehtiyac var. "Lazerlə holoqrafik qəliblər istehsalı" dedikdə, istənilən növ bank kartlarından tutmuş, pasportlar, pensiya kartları, adı ticari holoqramlara qədər hər şey nəzərdə tutulur və bizim şirkətin bütün bu işləri beynəlxalq rəqiblərindən daha keyfiyyətli görməsinə yüz faiz zəmanət verilir", deyə Rüfət Zeynallı saytımıza verdiyi açıqlamasında bildirib.

Daha sonra Rüfət Zeynallı şirkətin təhlükəsizlik sistemləri sahəsindəki fəaliyyətindən danışıb:

"Hazırda Türkiyənin nazirlik və xüsusi idarələrinin, o cümlədən Milli İstihbarat Təşkilatının (MİT) giriş qapılarında quraşdırılmış piyada və avtomobil buraxılış məntəqələrindəki lazer təhlükısizlik sistemlərinin hamısı məhz MTM tərəfindən istehsal olunub. Avtomobil buraxlış məntəqələrində istənilən tonnajlı avtomobillərin alt hissəsinin lazerli yoxalama sistemi hazırda inkişaf etmiş ölkələrdə nəinki dövlət idarələrində, hətta Gömrük-buraxılış məntəqlərində belə quraşdırılıb və bu iş üçün 10-15 nəfər adam bir-neçə saat ölkəyə girən və çıxan nəqliyyat vasitələrinin yoxlanması ilə məşğul olmurlar. Özünüz də gördüyünüz kimi şirkətimiz çoxprofillidir və inkişaf edən ölkımizdə bizim dünya standartlarına uyğun keyfiyyətli xidmətimizə böyük ehtiyac var".

Qeyd edək ki, Azərbaycana holoqramlar və bütün növ təhlükəsizlik sistemləri üçüncü ölkələrdən və əksər hallarda möhtəkir, reputasiyası qaranlıq firma və şirkətlər tərəfindən gətirilir.

Ölkə.az