"Liviyaya hücum səhv addım idi"

Britaniya qoşunlarının Liviyada hərbi əməliyyatlarda iştirakı yaxşı planlaşdırılmamışdı və bu, ölkədə siyasi, iqtisadi kollapsı sürətləndirdi.

Ölkə.Az BBC-yə istinadən xəbər verir ki, bu barədə Britaniya parlamentinin xüsusi komisiyyasının hazırladığı məruzədə məlumat verilir.

Komissiya baş verənlərə görə keçmiş baş nazir Devid Kemeronun məsuliyyət daşıdığını bildirir.

"Birləşmiş krallığın Liviyadakı fəaliyyəti pis planlaşdırılmış intervensiyanın bir hissəsi idi, bunun nəticələri bu gün də özünü göstərməkdədir. Bu pis siyasətin ən təhlükəli nəticəsi Avropadakı miqrasiya böhranı, Liviyada daxili silahlı münaqişə və insan haqlarının kütləvi şəkildə pozulmasıdır. O cümlədən, bu ərazidə İŞİD terror təşkilatının yaranması və genişlənməsi də yalnış siyasətin doğurduğu qorxunc nəticələrdən biridir",- deyə məruzədə bildirilir.

Müəlliflər Kemeronla yanaşı, Fransanın da məsuliyyət daşıdığını vurğulayırlar. Onların fikrinə görə, Fransa kəşfiyyatı ölkədə vətəndaş müharibəsinin dinc sakinlər üçün yaradacağı təhlükəni düzgün qiymətəndirməmişdi.

Fransanın xarici işlər nazirliyi isə Liviyadakı müharibəyə haqq qazandırmağa çalışıb.

"Müəmmər Qəddafidən nə desən gözləmək mümkün idi. O, səsləndirdiyi bütün təhdidləri həyata keçirməyə qadir idi. Ona kollektiv və qətiyyətli cavab verilməliydi, biz BMT mandatı çərçivəsində dinc əhalini müdafiə edərək hərəkət etdik",- deyə Britaniya XİN-in əməkdaşı bildirib.

Liviyaya qarşı əməliyyatlara 2011-ci il martın 17-də başlanılıb. Beynəlxalq koalisiyaya Fransa, Britaniya, ABŞ və bir neçə NATO dövləti daxil idi. Bu əməliyyatlar nəticəsində beynəlxalq koalisiyanın dəstəyini alan liviyalı üsyançılar Qəddafini öldürdülər. Lakin ölkədə vəziyyət bundan sonra daha da kəskin hal aldı.

Xatırladaq ki, daha öncə ABŞ prezidenti Barak Obama da Liviyaya hücumu siyasi səhv adlandırmışdı.

İlhamə
Ölkə.Az