""Neftçi" boks dili ilə desək nokaut vəziyyətdədir"

“Neftçi” klubunda kadr islahatlari həyata keçirilib.

Ölkə.Az-ın klubun rəsmi saytına istinadən verdiyi xəbərə görə, əsas komandanın son oyunlardakı uğursuz nəticələrini, Müşahidə Şurasının 28.08.2016-cı il tarixdə keçirilmiş iclası zamanı klubda islahatların davam etdirilməsi haqqında qərarlarını, eyni zamanda 09.09.2016-ci il tarixdə klubun səhmdarları ilə keçirilmiş görüşdə bu qərarların ən qısa zamanda yerinə yetirilməsi barədə nəticəyə gəlinməsini nəzərə alaraq, "Neftçi” PFK bir sıra qərarlar qəbul edib:

- Vəli Qasımov "A” komandanın baş məşqçisi vəzifəsindən azad edilsin;

- Elnur Məmmədov klubun icraçı direktoru vəzifəsindən azad edilsin;

- Mübariz Xudiyev klubun icraçı direktorunun idman məsələləri üzrə müavini vəzifəsindən azad edilsin;

- İcraçı direktorun idman məsələləri üzrə müavini vəzifəsi klubun struktur dəyişikliyi ilə əlaqədar olaraq ləğv edilsin;

"Neftçi” PFK yuxarıda adları sadalanan şəxslərə klubdakı fəaliyyətinə görə təşəkkürünü bildirib və onlara gələcək karyeralarında uğurlar arzulayıb.

Maraqlıdır, sözügedən istefalar klubda nələri dəyişəcək?

"Neftçi"nin keçmiş vitse-prezidenti Tahir Süleymanov Ölkə.Az-a açıqlamasında bildirib ki, "Neftçi" çox ağır duruma salınıb və artıq iki ildir bu proses davam edir:

"Mən sözümü indi yox, bu müddət əvvəl bildirmişəm və təəssüf ki, bütün analizlərim doğrulub. Klubdan göndərilənlərə uğurlar. Bu bir daha hər bir insana dərs olmalı və dərk etməlidir ki, bacardığı işlə məşğul olsun. İtirən tarixi klub olan "Neftçi" oldu. Bu acınacaqlı vəziyyətdən çıxmaq lazımdır. İcraçı direktor və baş məşqçinin klubdan getməsi onu göstərir ki, uğursuz transferlərin gətirilməsini bu insanlar həyata keçirib. Ən bacarıqsız belə əcnəbi menecer, işini, futbolu bilməyən klub rəsmisini Braziliyadan Bakıya qədər susuz və əliboş gətirər. Muşahidə Şurası vəziyyətdən çıxmaq istəyir. Peşəkar yanaşma, düzgün kadr siyasəti aparılarsa, müəyyən dirçəlişə ümid etmək olar. Səhvlərdən nəticə çıxarılmasa, yenə ictimaiyyət, jurnalist, azarkeşlər günahlandırılacaqsa, "Neftçi" uğursuz dönəmini davam etdirəcək. Klubun maliyyə problemi yoxdur. Əsas düzgün idarəçiliyin olmamasıdır.

Əməkdaşımızın "Belə fikirlər var ki, Elnur Məmmədov AFFA-nın baş katibi Elxan Məmmədovun adamı idi. Yəni dolayısıyla "Neftçi"də baş verənlərin məsuliyyəti həm də baş katibin üzərinə düşür. Düşüncələriniz maraqlıdır" replikasına Süleymanov belə cavab verib:

"Qeyd etdiyim kimi düzgün aparılan kadr siyasəti uğurun təməlidir. "Neftçi"nin son iki mövsümü əyani olaraq göstərdi ki, bu təyinat klubu 3-5 il geri saldı və "Neftçi"yə, ümumi futbola çox böyük zərbə vurdu. Futbolu bilməyən insanlara Azərbaycan futbolunda yer olmamalıdır. "Neftçi" boks dili ilə desək nokaut vəziyyətdədir. Sarsıdıcı zərbədən ayılmaq üçün son dərəcə dəqiq peşəkar addımlar atılmalıdır".

İntiqam VALEHOĞLU
Ölkə.Az