“Milli Şuranın mitinqində gülənçilər iştirak edir”
“Milli Şuranın mitinqində təhlükəli və qarışıq insanlar iştirak edir. Həmin insanların əksəriyyəti gülənçilər və dini ekstremizmi dəstəkləyən şəxslərdir”.
Bu fikirləri Ölkə.Az saytına açıqlamasında hakim Yeni Azərbaycan Partiyasının icra katibinin müavini, Milli Məclisin İctimai Birliklər və Dini Qurumlar Komitəsinin sədri Siyavuş Novruzov bildirib.
S.Novruzov qeyd edib ki, Milli Şuranın mitinqinə gələn adamlar arasında ayrı-ayrı yerlərdən pulla tutulan insanlar da var:
“Yəni, Milli Şuranın mitinqində xalqın milli marağı, siyasi əqidə və partiya mövqeyindən söhbət gedə bilməz. Bu insanlara tarix də öz qiymətini verib”.
Referendumun əhəmiyyətinə də toxunan komitə sədri vurğulayıb ki, Milli Şura erməni lobbisinin ayırdığı vəsaitlə referenduma qarşı addımlar atır:
“Amma erməni lobbisinə xidmət edən bəzi dairələri çıxmaq şərtilə, Azərbaycanda keçiriləcək referenduma xarici və beynəlxalq təşkilatlardan hər hansı etiraz yoxdur. Əgər olsa belə, bunun heç bir mənası olmayacaq. Çünki referendum Azərbaycan xalqının iradəsidir. Referenduma etiraz edən yalnız kiçik bir qrupdur ki, onlar da erməni lobbisindən pul alaraq bu işi həyata keçirir.
Ağılı başında olan və referenduma çıxarılan məsələləri diqqətə oxuyan hər bir adam da görür ki, burada əsas məsələ dövlət strukturunun təkmilləşdirilməsinə, ölkədə insan hüquq və azadlıqların qorunmasına yönəlib. Referendumda Azərbaycanın iqtisadi inkişafının artırılması, beynəlxalq müqavilələrdən irəli gələn müəyyən öhdəliklərin icrası və digər sahələr üzrə atılacaq addımlar nəzərdə tutulur”.
Zaur Əziz
