"ABŞ Konqresindən icazə də almalıyıq ki, evlənək, boşanaq, uşağımız olsun, ya olmasın?"
ABŞ Konqresi Azərbaycanda keçiriləcək referendumla bağlı Azərbaycan prezidentinə məktub ünvanlayıb.
Koqresmenlər Kristofer Smit, Jozef Pitts və Adam Şiff tərəfindən imzalanmış məktubda Azərbaycanda bu referendumun keçirilməməsi məsləhət görülür.
Məktubda diqqət çəkən əsas məqam Konqresin referendum keçiriləcəyi təqdirdə Azərbaycan hökumətinin legitimliyinin şübhə altına düşəcəyi haqda səsləndirilən fikirdir.
Maraqlıdır, əgər referendum keçirilərsə, ABŞ Azərbaycana qarşı hansı təsir rıçaqlarından istifadə edə bilər? Ümumiyyətlə, Azərbaycanın daxili işi olan referendum niyə ABŞ administrasiyasını bu qədər narahat edir?
ABŞ konqresmenlərinin Azərbaycan prezidentinə ünvanladığı məktub barədə millət vəkili Araz Əlizadə Ölkə.Az-a danışıb:
"İnsanların gözündə ABŞ demokratiyanın beşiyi kimi görünürdü. Ancaq bu məsələ çoxdan tarix olub. ABŞ diktatorları müdafiə edəndə, gizli həbsxanalar saxlayanda, müstəqil dövlətləri viran qoyub orada dövlət çevrilişləri edəndə, nəhayət Azərbaycan üçün isə işğalçı Ermənistanı dəstəklədikdə ABŞ demokratiyasının nə olduğunu gördük. Təcavüzkar Ermənistan və erməni diasporası ABŞ Konqresində çox böyük nüfuza malikdirlər. ABŞ-da heç kimin yadına düşmür ki, Azərbaycan torpaqları işğal altındadır.
Azərbaycan dövləti öz dövlətçiliyini möhkəmləndirdikdə o dəqiqə Azərbaycanda milli xəyanətkarlar tapılır və onlar başlayırlar çığır-bağır, hay-həşir salmağa ki, qoymayın Azərbaycanda demokratiya yoxdur. Avropada icazəsiz mitinqlər keçiriləndə görün, insanları polis necə döyür.
20 ildən artıq Azərbaycanda müxalifətçilik edib cah-cəlal içində yaşayanda, övladları xaricdə təhsil alanda və həmin övladlar binamusluq edib ABŞ Konqresinə müraciət edəndə ki, Azərbaycana qarşı iqtisadi sanksiyalar tətbiq edilsin, bu sizcə demokratiyadır? Azərbaycanda referendum keçiriləndə, xalqın rəyi soruşulanda bu anti-demokratik addımdır? Kosovoda referendum keçiriləndə və ABŞ bunu tanıyanda bu olur demokratiya. Serbiya öz dövlətini qoruyanda olur anti-demokratiya?
"Demokratiya və "insan haqları" sözü çoxdan dünyanın güclü dövlətlərinin əlində dəyənəkdir ki, özlərindən kiçik, müqavimət göstərmək iqtidarında olmayan dövlətlərin başına çırpsınlar, onları qul, kölə vəziyyətində saxlasınlar. ABŞ Konqresinin və prezidentinin hüququ yoxdur Azərbaycana desin ki, referendum keçir və ya keçirmə. Bu Azərbaycan xalqının, dövlətinin hüququdur.
Belə çıxır biz Konqresdən icazə də almalıyıq ki, evlənək, evlənməyək, boşanaq, boşanmayaq, uşağımız olsun, ya olmasın? Bunu gərək Makkeyn kimi meymunlar müəyyən etsin?".
Səxavət Məmməd
Ölkə.Az
