Fazil Mustafa: "Bu hərəkət xəstə təfəkkürdən doğur"

Müsavatçı İkram İsrafilin oğlunun toyuna YAP-çı deputat Aydın Mirzəzadənin gəlməsini AXCP üzvləri ictimaiyyətin müzakirəsinə çıxarıblar.

Müsavat tərəfi də buna Elşad Paşasoyun"Maskaları yırtan toy fotosu" başlıqlı köşəsi ilə cavab verib.

Ölkə.az bu məsələ ilə bağlı millət vəkili Fazil Mustafanın mövqeyini öyrənib:

Fazil Mustafa: "Bu xəstə düşüncədən yaranan bir məsələdir. Elə məsələlər var ki, siyasətin orda qarışması heç bir halda məqsədə uyğun deyil. Bu məsələ təkcə müxalifətdə deyil, iqtidar cinahında da var. Fikirləşirlər hansısa müxalifətçinin toyuna və yaxud yasına getsə bu narahatçılıq yaradacaq. Bu cür hallar müxalifət cinahında daha az olmalıdır. Ona görə ki, müxalifət daha çox deokratik olduğunu iddia edən qüvvədir, daha çox insanlara müəyyən dərəcədə münasibətdə siyasətdən yox, sırf vətəndaşlıq mövqeyini ortaya qoyduğunu deyən qüvvədir. Gərək bunu iddia edən tərəfin bu məsələlərə belə yanaşması olmasın. Bu özü çox böyük mədəniyyətsizlikdir. Bu mədəniyyətsizliyin Azərbaycanda insan münasibətlərinə, vətəndaş münasibətlərinə ciddi zərbə vurduğunu düşünürəm. Ona görə də, belə məsələni gündəmə gətirmək, bunu ittiham formasına çevirməyin heç bir mənası yoxdur. Bu sırf xəstəlikdir, mədəniyyətsizlikdir və ümumiyyətlə bu cəmiyyət tərəfindən qınanmalıdır ki, belə məsələni heç vaxt bir də gündəmə gətirməsinlər".

Səxavət Məmməd
Ölkə.az