Məktəbli qızları aborta aparan
Xəbər verdiyimiz kimi, ötən il Azərbaycanda 15-17 yaş arası 50 qız, 2014-ci ildə isə 88 qız abort etdirib. Yeniyetmə qızlar arasında abort hallarının müşahidə edilməsi cəmiyyət tərəfindən birmənalı qarşılanmır.
Elmi-Tədqiqat Mamalıq və Ginekologiya İnstitutunun elmi katibi, Səhiyyə Nazirliyinin Doğuşayardım Komissiyasının üzvü Leyla Məmmədova məktəbli qızların aborta üz tutmasının səbələrini açıqlayıb.
Ölkə.Az xəbər verir ki, nazirlik rəsmisi azvision.az-a bildirib ki, məsələnin kökündə başqa problemlər var. Onun sözlərinə görə, yeniyetmələrin aborta getməsində erkən nikah problem qabardılmalıdır.
“Bunu məktəbli qızların aborta getməsi halı kimi qaldırmaq lazım deyil. 15-17 yaşında aborta gedən qızlar erkən nikaha girmiş yeniyetmələrdir. Hamiləlik zamanı onlara tibbi göstəriş verildiyi üçün aborta gedilib. Qadın öz istəyi ilə hamiləliyi sonlandırmayıb”.
L.Məmmədova bildirib ki, 15-17 yaş qrupunda aborta gedənlər arasında məktəbli qızların olması doğru deyil: “Onlar arasında nikahdankənar, gizli yolla cinsi əlaqəyə girən qızlar yoxdur. Burada qaldırılmalı problem erkən nikah məsələsidir. Həmin qızlar ailə qurur, ailələrin razılığı ilə dini nikaha girirlər. Onların bədənləri hamiləliyə hazır olmadığı üçün ya özbaşına abort baş verir, ya da tibbi göstərişlə, məsələn qızın sağlamlığı və ya uşaqda problem olarsa, uşaqlıqdan kənar hamiləlik olarsa abort edilir. Bu, o demək deyil ki, kiminsə qızı nikahdan kənar gizli cinsi əlaqəyə girib, hamilə qalıb, abort etdirib”.
Komissiya üzvü qeyd edib ki, yeniyetmələrdə hamiləlik pozuntuları əsasən ikinci trimestrdə pozulur. “Abort edən qadınlar ailəli olduqları üçün aborta öz arzuları ilə getməyiblər, sadəcə hər hansı göstəriş olub. Həmin yeniyetmələrin xəstəlik tarixçələrinə baxsaq görəririk ki, hamiləliklərin pozulması ikinci trimestrdə olur. Bu, o deməkdir ki, abort həmin qızların arzusu ilə olan bir şey deyil. Qadının arzusu ilə hamiləliyin pozulması yalnız 12-ci həftəyə qədər ola bilər. Demək burada hər hansı tibbi göstəriş olub”.
