"İŞİD, Əl-Qaidə və digər terror təşkilatlarını ABŞ yaradıb"

ABŞ-ın Ankaradakı səfirliyindən öz vətəndaşlarına terror xəbərdarlığı edilməsinin ardından bir saat keçməmiş İŞİD Türkiyəni raket atəşinə tutub.

ABŞ səfirliyinin bildirdiyi kimi, İŞİD Qaziantep şəhərinə bomba atıb.

Hazırda türk ordusu Suriya ərazisində İŞİD-ə qarşı əməliyyatlar keçirir. Buna cavab olaraq da İŞİD-in həmlə edəcəyi gözlənilən idi.

Bununla bağlı millət vəkili Araz Əlizadə Ölkə.Az-a danışıb:

"İŞİD, Əl-Qaidə və digər terror təşkilatları hamısı eyni yerdən yaradılıb. Bunun da yaradıcısı dünyanın bir nömrəli fövqəldövləti ABŞ-dır. ABŞ atalar misalındakı kimi dovşana qaç, tazıya tut deyir.

ABŞ da başda olmaqla 67 dövlətdən ibarət İŞİD-ə qarşı yaradılmış koalisya 1 saat ərzində Suriya ordusunun mövqelərini bombardman edib. Sonra da, bu bombardmanı səhvən etdiklərini və buna görə üzr istədiklərini bildiriblər. Belə bir sual çıxır, ABŞ ordusu bu qədər maymaqdı ki, haranı bombaladığını bilməsin?

ABŞ səfirliyi öz vətəndaşlarını xəbərdar edir, anladıq, bəs müttəfiqi olan Türkiyəni niyə xəbərdar etmir? Əgər bundan xəbərdar idilərsə, demək bombanın haradan atılacağını da bilirdilər. Buna qarşı niyə qabaqlayıcı tədbir görməyiblər? Türkiyə İŞİD-ə qarşı müharibəni sonuna qədər davam etdirməlidir".

Səxavət Məmməd
Ölkə.Az