"Özəlləşmə zamanı oğru məmurlar çoxlu torpaq almışdılar..."

Bu gün ölkədə Referendum keçirilir.

Son günlər ölkədə ən ciddi müzakirə edilən mövzu referendumla bağlı məsələlərdir. İqtidar tərəfi referendumun vacibliyini bildirsə də, müxalifət tərəf bunu kəskin tənqid edir.

Referendumla bağlı millət vəkili Araz Əlizadə Ölkə.Az-a danışıb:

"Konstitusiya daşdan, qranitdən deyil, təbii ki, təkmilləşməlidir. Həyat yeni-yeni məsələlər ortaya çıxardır. Bu gün Azərbaycanda özünü müxalifət adlandıran qüvvələr vitse-prezidentlik maddəsindən yapışıblar.

Mənim üçün ən maraqlı maddə torpaqla bağlı olan maddədir. Özəlləşmə zamanı oğru məmurlar çoxlu torpaq almışdılar. O torpaqların çoxusu da kənd təsərrüfatı torpaqlarıdır. Həmin məmurlar ya o torpaqlarda ev tikib, ya da heç istifadə etmirlər. Azərbaycanın ərazisi balacadır. Kənd təsərrüfatı üçün torpaq çatışmazlığı var. Həmin torpaqları yenidən canlandırmaq olar. Mənim üçün Referendumda səsverməyə çıxarılan əsas məsələ budur. Odur ki, bu referendum və Konstitusiyada dəyişikliklər lazım idi. Prezidentin 7 il müddətinə seçilməsinin tərəfdarıyam. Ölkədə onsuz da tez-tez seçkilər keçirilir. Seçkilər həm də böyük xərc deməkdir. Ona görə də təklif edirəm ki, Bələdiyyə seçkiləri ilə Parlament seçkiləri eyni vaxtda keçirilsin.

Referendumun əleyhinə çıxanlar, özünü müxalifət adlandıran qüvvələr, Qarabağ məsələsində həmişə ikili standartlardan çıxış edən və Azərbaycanın dostu olmayan dövlətlər, o cümlədən ABŞ-ın ən böyük meymunu olan Con Makkeyndir.

Stalinin belə bir sözü var idi, "mənim düşmənim məni tərifləyirsə, görəsən harada səhvə yol vermişəm?", "mənim düşmənlərim bizi pisləyirsə, demək düz yoldayıq". Fransanın dahi prezidenti Şarl de Qolun çox qəribə görünüşü var idi. Onun karikaturasını çəkmək çox asan idi. Şarl de Qoll işə gələndə mətbuat xidmətinə birinci sualı o idi ki, "mənim karikaturamı çəkiblər?". Mətbuat xidməti "yox" deyən kimi, Şarl de Qoll deyirdi, "dərhal hökuməti yığın, biz nədəsə səhv etmişik".

Səxavət Məmməd
Ölkə.Az