"Qərbi narahat edən əsas məsələ ondan ibarətdir ki, Azərbaycan hakimiyyəti..."

Dünyada hərbi münaqişələrlə yanaşı çox güclü informasiya müharibəsi gedir.

Rusiya ilə NATO və ABŞ arasında çox ciddi informasiya müharibəsi gedir. NATO-nun strateji kommunikasiyalar üzrə direktoru Yanis Stars Qərb ölkələrinin Rusiyanın onlara qarşı yaydığı dezinformasiyanın qarşısını almaqda aciz olduqlarını bildirib. NATO-nun informasiya və kommunikasiya işlərindən cavabdeh olan şəxsin belə bəyanat verməsi Qərbin siyasi dairələrini çaxnaşmaya salıb. Hər il propaqanda fəaliyyətinə milyardlarla dollar xərcləyən Qərb ölkələrinin Kreml propaqandası qarşısında acizliyi artıq göz qabağındadır.

Rusiya və Qərblə yanaşı Azərbaycan da müharibə şəraitində olduğu Ermənistanla informasia müharibəsi aparır.

Rusiya-NATO, Azərbaycan-Ermənistan arasında gedən informasiya müharibəsi və baş verən proseslərlə bağlı politoloq Elşən Manafov Ölkə.Az-a danışıb:

"Hal-hazırda dövlətlər arası münasibətlərdə informasiya müharibəsi xüsusi ilə fövqəl və regional dövlətlərin dünyanın bu və ya digər bölgəsindəki geosiyasi maraqları ilə bağlı məsələləri özündə ehtiva edir. NATO rəsmilərinin bəyan etməsi ki, NATO milyardlarla vəsait xərcləməsinə baxmayaraq, Rusiyaya qarşı informasiya müharibəsində uduzur, bu əslində kifayət qədər səhih məlumat deyil. NATO ilə Rusiya arasında bu ilin sentyabr ayının 10-da Suriya probleminin danışıqlar yolu ilə çözülməsi üçün müvafiq razılıqlar əldə edildi. Bir həftə keçməmiş, sentyabr ayının 17-də NATO-nun hava qüvvələri, konkret olaraq 4 qırıcı təyyarə Suriya ordusunun dislokasiya mövqelərini bombardman etməyə başladı. Sonradan Obama rəsmən Bəşər Əsəddən üzr istədi ki, bu səhv hərəkət olub. Səhv hərəkət o ola bilərdi ki, bunu 1 təyyarə və 1 dəfə etsin, ancaq 4 təyyarənin saat yarım eyni bölgəyə zərbələr endirməsi səhv hərəkət deyildi. Bu, sadəcə olaraq Suriya ilə bağlı Rusiya ilə NATO və ABŞ arasında əldə edilmiş razılıqların ABŞ tərəfindən bilərəkdən birtərəfli şəkildə pozulması idi ki, daha çox Rusiyanı bu məsələdə ittiham etsinlər.

Hal-hazırda ABŞ-ın siyasətində dünyanın özü üçün ciddi təhlükə törədəcək amil ondan ibarətdir ki, ABŞ-ın müdafiə naziri ABŞ-ın dövlət katibi Kerri ilə Rusiyanın xarici işlər naziri Lavrov arasında imzalanan sənəddən bir həftə sonra ABŞ prezidenti, ali baş komandanı Obamaya məlumat vermədən Suriyadakı məlum bölgəni bombalatdırdı. Əslində bu o deməkdir ki, Obamanın prezident olmasına baxmayaraq ABŞ-da növbəti prezident seçkilərinə qədər çox kövrək və proqnozlaşdırıla bilməyən bir şərait hökm sürür. Bu şərait ondan ibarətdir ki, rəsmi Vaşinqtonun iki məsul şəxsi - dövlət katibi və müdafiə naziri arasında gərginlik dünyaya dezinformasiyanın verilməsini özündə ehtiva edir. Məqsəd də ABŞ-da dövlət idarəçiliyinin sükanı arxasına gələ biləcək şəxsin məhz ümumdünya məxfi hökumətinin maraqlarını təmsil etməsi ilə bağlı məsələləri özündə ehtiva etməsi ilə bağlıdır.

Məlum məsələdir ki, Klintonun və ya Trampın prezident seçilməsi sırf ABŞ seçicilərinin bu məsələyə münasibətindən asılı olan konteksdə öz həllini tapmayacaq. Bu, ABŞ-da dövlət idarəsinin sükanı arxasına keçən şəxsə ümumdünya məxfi hökumətinin kimə etimad etməsindən asılı olacaq. Bu, bütün hallarda xanım Klinton olacaq. Dünya artıq təxminən 8 il əvvəl fövqəldövlətin başında indiyə qədər ABŞ tarixində görünməmiş bir hadisənin şahidi oldu, qaradərili ABŞ vətəndaşı prezident oldu. İndi də növbəti eksperiment ondan ibarət olacaq ki, ABŞ-ı qadın idarə edəcək".

Azərbaycanın daxil olduğu bölgə ilə bağlı məsələyə gəldikdə isə politoloq bildirdi ki, Rusiyanın bölgə ilə bağlı maraqları məlumdur:

"Qərbi narahat edən əsas məsələ ondan ibarətdir ki, Azərbaycan hakimiyyəti ölkənin milli təhlükəsizlik maraqlarından çıxış edərək, tamamilə uğurlu balanslaşdırılmış siyasət həyata keçirir. 4 il sonra bloklara qoşulmayan dövlətlərin yüksək səviyyədə sammitinin Bakıda keçirilməsi ilə bağlı əldə edilmiş razılıqlar göstərir ki, dünya dövlətlərinin mütləq əksəriyyəti Azərbaycan iqtidarının bu siyasətini dəstəkləyir və bəyənir. Bu siyasət ABŞ və NATO-nun maraqlarına cavab verir. Əslində Azərbaycanda referendum ərəfəsində 5-ci kalonun hərəkətləri də ölkədə stabilliyin pozulmasına yönəldilmişdi. Ölkədə məhz müəyyən qüvvələrin sifarişi ilə sabitliyin pozulmasına yönəldilmiş hərəkətlər baş verdi. Sadəcə bəlli oldu ki, ölkədə manatın iki dəfə devalvasiyasından sonra ölkə əhalisinin böyük əksəriyətinin gəlirinin əhəmiyyətli şəkildə aşağı düşməsinə baxmayaraq, dövlət büdcəsində 1 milyardlıq kəsirə baxmayaraq, əhalinin sosial durumunun ağırlaşmasına baxmayaraq narazı elektorat müxalifətin radikal qanadının ardınca getmədi. Bu hər halda məlum qanadın hərəkətlərini istiqamətləndirən və maliyyələşdirən Qərbin xüsusi xidmət orqanlarını düşündürməyə bilməz. Bu anlamda informasiya müharibələri var, olub, olacaq da.

Azərbaycan da Şərqlə (şərq deyəndə Rusiya nəzərdə tutulur) Qərb arasında geosiyasi yolun üzərində yerləşir. Azərbaycanda maraqlar kifayət qədər toqquşur. Belə bir şəraitdə Azərbaycan hökumətinin keçirdiyi siyasət ölkədə stabilliyin qorunub saxlanılmasına, ölkənin milli təhlükəsizlik maraqlarının gözlənilməsinə yönəldilib. Stabilliyi pozmaq üçün mövcud qüvvələrin hərəkətləri heç bir nəticə vermədi. Bu referendumun nəticəsində də özünü göstərdi.

Azərbaycan zaman-zaman informasiya müharibəsində Ermənistana uduzmasına baxmayaraq, sonradan neft diplomatiyasının bizə vermiş olduğu imkanlardan, neft dollarından səmərəli və layiqincə istifadə edə bilərək, müxtəlif dövlətlərə, hətta ABŞ-ın Konqresində belə lobbiçilik siyasəti nəticəsində bizim maraqlarımızı təmsil edə biləcək dairələrlə bu və ya digər təmaslar qura bildik. Hal-hazırda açıq desək, Azərbaycan informasiya müharibəsində Ermənistanı qabaqlayır. İstər hərbi baxımdan, istər iqtisadi, istər də informasiya müharibəsində Ermənistandan üstünlüyümüz göz qabağındadır. Sadəcə Qərbin xiristian təəssübkeşliyi, Ermənistana olan dəstək, ikili standartlardan çıxış etmələri Qarabağ probleminin çözülməsinə mənfi təsirini göstərir".

Səxavət Məmməd
Ölkə.Az