Nazirlikdən iş adamının müraciətinə cavab: Şadlıq sarayı sahibi qərəzlidir
Balakən rayon sakini Şamıl Qebeyevin Rayon Polis Şöbəsinin rəisi Elnur Həsənov tərəfindən təqibə məruz qalması barədə müraciətinə Daxili İşlər Nazirliyi Mətbuat Xidmətinin rəis müavini Ehsan Zahidov münasibət bildirib.
Rəis müavini Ölkə.Az saytına bildirib ki, vətəndaşın müraciəti mətbuatda dərc olunandən sonra Mətbuat Xidməti tərəfindən ilkin araşdırma aparılıb. Məlum olub ki, vətəndaş Ş.Qebeyevin RPŞ rəisi barədə yazdığı iddialar əsassızdır və qərəzdən irəli gəlir:
“Qeyd olunan müraciətin müəllifi Balakəndə şadlıq sarayının sahibidir. Görünür, bu günə qədər ona elə gəlirmiş ki, “BMW X5” markalı avtomobili ilə yol-hərəkət qaydalarını pozsa da, avtomobili sənədsiz idarə etsə də heç kim onu saxlaya bilməz. Bir neçə gün öncə, sentyabrın 24-də saat 18:30 radələrində şəhərin mərkəzi küçələrindən birində “BMW X5” markalı avtomobil yol-hərəkət qaydalarını nümayişkəranə şəkildə pozduğuna görə həmin ərazidə xidmətdə olan yol-patrul xidmətinin əməkdaşları tərəfindən ona “saxla” işarəsi verilib. Lakin sürücü Şamil Qebeyev yol polisinin tələbinə məhəl qoymadan hərəkətini davam etdirib. Qayda pozucusu saxlandıqdan sonra ondan sürücülük vəsiqəsi və avtomobilə aid sənədlər tələb olunub. O isə laqeydliklə üzərində heç bir sənədinin olmadığını bildirib. Belə olan halda qanuna müvafiq olaraq avtomobil idarəetmədən çıxarılaraq qorunan duracağa yerləşdirilib. YPX əməkdaşları tərəfindən sürücü Ş.Qebeyev barəsində isə İXM-in 327.1 və 327.3-cü maddələri ilə protokol tərtib edilib.
Balakən RPŞ-nin rəisi Elnur Həsənovun və onun tabeliyində olan əməkdaşların qanun və qayda pozanlara qarşı belə prinsipial və barışmaz münasibəti, görünür, sadlıq sarayının sahibini qəzəbləndirib və o da “polis rəisi sahibkarı təqib edir”- deyə müraciət hazırlayaraq mətbuata göndərib. Ona görə də bir daha vurğulayıram ki, Şamil Qebeyevin Balakən RPŞ-nin rəisi barədə dediyi iddialar əsassızdır və qərəzdən irəli gəlir".
