Dünyanın ən maraqlı restoranları

Dünyada bir çox maraqlı restoran var. Müştəriləri cəlb etmək, rəqabət aparmaq üçün sahibkarlar zaman dəyişdikcə yeni üsullara əl atır, müxtəlif ideyalara baş vururlar.

Ölkə.az saytı dünyanın bəzi maraqlı və qeyri-adi restoranlarını təqdim edir:

İtaliyanın Pugliya bölgəsində bir restoran uçurumun sahilində olan bir mağarada inşa edilib. Restoranın adı "Ristorane Grotta Palazzese"dir.

Keniyanın Langata şəhərində isə sahibkarlar maraqlı bir layihəyə imza atıblar. İnşa edilən "Giraffe Manor" restoranında yeməyinizi pəncərədən boylanan zürafələrlə bölüşə bilmək imkanı əldə edə bilərsiniz.

Şəlalənin ortasında restoran olar? Təbii ki olar! Əgər siz Filippində isəniz, hər şey olar! Filippində Labassin şəlaləsi restoranı var. Şəlalənin tam altında qurulan restoran turistlərin ən çox ziyarət etdiyi məkanlardan biridir.

Köhnə bakılılar yaxşı xatırlayır, Sovet dövründə bulvardakı Sadko ərazisində sualtı restoran layihəsi olub. Amma sonradan layihə baş tutmadı. Bununla belə, Maldivi adalarında "İthaa Undersea Restaurant" dənizin 5 metr altında inşa edilib. Hər tərəfi şüşədən olan restoranda oturan müştərilər rahatlıqla dənizin altını seyr edə bilər. Bu restoran dəfələrlə "dünyanın ən gözəl restoranı" nominasiyasının qalibi olub.

Fransa Alplarında Avropanın ən yüksək dağı Aiguille Du Midi sayılır. Bu dağın zirvəsində açılan restoran gün ərzində cəmi iki saat fəaliyyət göstərir. 3842 metr yüksəklikdə olan restorana getmək üçün ya dağa dırmanmaq, ya da helikopterdən istifadə etmək lazımdır.

Finlandiyanın da iş adamları maraqlı restoran inşa ediblər. Burada fəaliyyət göstərən "The Snowcastle of Kemi" restoranı tam olaraq buzdan tikilib. Restorana daxil olmadan əvvəl, əməlli-başlı qalın geyinmək lazımdır.

İspaniyada isə, El Diablo vulkanının dibində restoran tikilib. Bu restoranda təklif edilən yeməklər vulkan alovunda bişirilir.

Bali adasında müştərilərə xidmət edən "Tsavo Lion Restaurant" isə vəhşi təbiətin qoynunda inşa edilib. Siz yeməyinizi yediyiniz zaman istənilən an vəhşi heyvanlar, xüsusilə də aslan və şir pəncərəyə yaxınlaşa bilər.

Hikmət
Ölkə.az