Hərbi ekspert: \"Müdafiə xərclərinin azalması ön xəttə heç bir təsir etməyəcək\"

2017-ci ilin büdcə layihəsində müdafiə xərcləri azaldılacaq.

Müdafiə xərclərinin azaldılacağı ilə bağlı xəbərin yayılması müharibə şəraitində olan Azərbaycanda birmənalı qarşılanmadı. Bununla bağlı bir çox ekspertlər narahatçılıqlarını dilə gətirdilər.

Məsələ ilə bağlı hərbi ekspert Üzeyir Cəfərov Ölkə.Az-a danışdı:

"2017-ci ilin büdcə layihəsində müdafiə xərclərinin azalmasına görə narahat olmağa dəyməz. Azərbaycan müharibə şəraitindədir. 2016-cı ildə nəzərdə tutulan təlimlər və digər məsələlər vaxtında planlaşdırılıb, onlara maliyyə vəsaiti ayrılıb, bu il üçün hansısa bir narahatçılıq gözlənilmir.

2017-ci il üçün büdcə məsələlərinə baxış zamanı müdafiə xərcləri ilə bağlı bəzi düzəlişlər həyata keçirilə bilər. Bu o anlama gəlir ki, əvvəlki illərdə Müdafiə nazirliyi həm ön xətdə, həm də arxa cəbhədə tikinti, yenidənqurma işləri həyata keçirirdi. Bundan sonra müdafiə nazirliyi bu məsələyə yenidən baxacaq. Ön xəttlə bağlı heç bir dəyişiklik olmayacaq. Ön xəttə lazım olan hər şey ən yüksək səviyyədə həyata keçiriləcək. Arxa cəbhədə olan bəzi hərbi hissə və birləşmələrdə sözsüz ki, tikinti, yenidənqurma və digər məsələlər bir qədər arxa plana keçəcək. Arxa cəbhədə normal kazarmalar var, onların daha müasir kazarmalarla əvəzlənməsi növbəti mərhələyə saxlanılacaq. Çünki ölkə müharibə şəraitindədir. Bu gün biz nə qədər ki, Dağlıq Qarabağla bağlı məsələlərin həllinə nail olmamışıq, bütün diqqət ön xəttə veriləcək. Oraya lazım olan silah- sursatın verilməsində, infrakstrukturun qurulmasında heç bir problem olmayacaq.

Ordumuzun təlimləri qaydasında qalacaq. Bildiyim qədər daha geniş miqyaslı, Azərbaycan-Türkiyə, Azərbaycan-Türkiyə-Gürcüstan və o cümlədən daxili hərbi təlimlər planlaşdırılıb.

Müdafiə xərcələrinin azaldılması dedikdə sırf Müdafiə Nazirliyinin xərcləri azaldılacaq fikri başa düşülməməlidir. Söhbət bütövlükdə müdafiə və təhlükəsizliklə bağlı güc strukturlarının xərclərinin azaldılmasından gedir. Ölkənin müdafiəsi və ərazi bütövlüyünü qoruyan müdafiə nazirliyində hər hansısa bir sıxıntı gözlənilmir. Belə razılaşdırlıb ki, ölkənin müdafiəsi üçün hər şey ediləcək, bu məsələdə Müdafiə Nazirliyi hər hansı bir problemlə qarşılaşmayacaq".

Səxavət Məmməd
Ölkə.Az