Roma Papası Gürcüstanda
Roma Katolik kilsəsinin başçısı Papa Fransisk Gürcüstan paytaxtı Tbilisiyə üçgünlük səfər edib.
Ölkə.Az xəbər verir ki, Roma Papası Gürcüstanda ilk olaraq ölkə prezidenti Georgi Marqvelaşvili ilə görüşüb. Onlar ilk olaraq Tbilisi beynəlxalq hava limanında, sonra isə prezident sarayında görüşüblər. Hava limanında təntənəli mərasim keçirilib. Təyyarənin pilləkənləri qarşısında Roma Papası Gürcüstan prezidenti və birinci xanım, Bütün Gürcüstanın katalikos-patriarxı İkinci İliya, parlament sədri David Usupaşvili, dövlət rəsmiləri, Tbilisi meri David Narmaniya və dəvət edilmiş qonaqlar tərəfindən qarşılanıb. Prezident sarayında keçirilən görüş bağlı qapılar arxasında keçirilib. Görüşdən sonra mətbuat qarşısına çıxış edən Marqvelaşvili bildirib ki, Gürcüstan hər zaman Vatikanın dəstəyini hiss edir və bu iki dövləti çoxəsrlik münasibətlər birləşdirir. Öz növbəsində çıxış edən Roma Papası qeyd edib ki, çoxəsrlik tarix və dəyərlərə sahib olan Gürcüstan Avropa və Asiya arasında körpü rolunu oynayır.
Günün ikinci yarısında Roma Papası Gürcüstan Patriarxlığına baş çəkib. Görüşdə hər iki kilsə nümayəndələri və digər şəxslər iştirak edib. Papa gecəni evsizlər üçün nəzərdə tutulmuş sığınacaqda keçirib.
Bu gün isə, səfər çərçivəsində camaatla görüş keçirən Roma Papası Fransisk, ibadət üçün stadiona toplaşanlara müraciət edərək, "Allah böyük əməlləri ilə sadə, səmimi və vicdanlı insanlarla edir, uşaqlar da bunu başa düşür", deyib. O, eyni zamanda Gürcüstanda qadınların xüsusi rolu olduğunu vurğulayıb.
Qeyd edək ki, Roma Papasının Gürcüstan səfəri hələ davam edir.
