Politoloq: Bu o demək deyil ki, Pakistanla müttəfiqik və Hindistana müharibə elan etməliyik

İki nüvə dövləti Hindistan və Pakistan arasında yenidən gərginlik yaşanıb.

Uzun illərdir ki, Hindistan və Pakistan arasında Kəşmir vilayəti probleminə görə gərginlik yaşanır.
Bu yaxınlarda baş verən lokal toqquşmadan sonra Pakistan tərəfi Hindistanı nüvə silahı ilə hədələyib.

Pakistan Hindistan münaqişəsi ilə bağlı politoloq Zərdüşt Əlizadə Ölkə.Az-a danışıb:

"İngiltərə Hindustan yarmadasını işğal edəndə əsrlərlə bir yerdə yaşamış müsəlmanlar və induslar arasında münaqişə yaratdı. Ortada hər iki xalqdan boşboğaz, başıboş vətənpərvərlər çıxıb əks tərəfə nifrət təqlid etməyə başladı. Böyük qırğınlar və etnik təmizləmələr baş verdi. Əhalinin qarışıq yaşadığı Kəşmir ştatı üstündə Hindistanla Pakistan arasında ərazi münaqişəsi yarandı. Kəşmir faktiki olaraq iki hissəyə bölünüb. Kəşmir əhalisinin əksəriyyəti müsəlmandır. 60-70 ildir ki, Pakistanla Hindistan arasında Kəşmir üstündə kiçik toqquşmalar yaşanır.

Hər iki dövlət nüvə silahına sahibdir. Nüvə silahı həm hədə, həm də əks tərəfi hücum etmək fikrindən daşındıran silahdır. Pakistanın Hindistanı nüvə silahı ilə hədələməsinə baxmayaraq, düşünmürəm ki, nüvə müharibəsi olmayacaq. Nüvə silahını ilk tətbiq edən ölkə faktiki olaraq bütün dünya tərəfindən təcrid ediləcək və günahkar sayılacaq. Hər iki dövlət eyni əsas və hüquqla Kəşmirə iddia etdiyi üçün beynəlxalq vasitəçilərin rəyinə ehtiyac duyurlar. Pakistan Kəşmirdə təxribat törədən terrorçulara şərait yaradır, Hindistan isə Kəşmirdə sərt siyasət həyata keçirir. Barış üçün həllik zəmin yoxdur.

Azərbaycan hər iki dövlətlə, həm Hindistan, həm də Pakistanla xoş münasibətdədir. Pakistanla daha yaxın münasibətin olması Pakistanla müttəfiqik və Hindistana müharibə elan etməliyik kimi anlaşıla bilməz. Azərbaycan Hindistanla da, Pakistanla da dost ölkədir".

Səxavət Məmməd
Ölkə.Az