\"ASAN xidmət indeksi\" üzrə qiymətləndirmə mexanizmi təqdim olundu

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi və "ADA" Universiteti tərəfindən hazırlanmış "ASAN xidmət indeksi" üzrə dövlət xidmətlərinin qiymətləndirilmə mexanizmi təqdim olunub.

Tədbirdə çıxış edən xarici işlər nazirinin müavini, "ADA" Universitetinin rektoru Hafiz Paşayev bildirib ki, "ASAN xidmət"lə "ADA" Universiteti arasında yaxşı münasibətlər formalaşıb: “ 15 ildən çoxdur, Elektron hökumətlə bağlı işlər görülür. “ASAN xidmət”in fəaliyyəti təqdirəlayiqdir. İlkin mərhələdə bizim 2-3 professorumuz layihənin hazırlanmasında iştirak edib. Bizim təqdimatımız əsasında "ASAN xidmət" BMT-nin mükafatına layiq görülüb”.

Dövlət Agentliyinin sədri İnam Kərimov qeyd edib ki, "ASAN xidmət indeksi” üzrə dövlət xidmətlərinin qiymətləndirilmə mexanizmi noyabr ayından etibarən fəaliyyətə başlayacaq, qiymətləndirmənin nəticələri isə 2017-ci ilin ortalarında cəmiyyətə açıqlanacaq. İ.Kərimov bildirib ki, bu mexanizm Dövlət Agentliyi və "ADA" Universitetinin ortaq layihəsidir: "Mexanizmin yaradılmasında məqsəd dövlət xidmətlərində keyfiyyətin və operativliyin artırılmasıdır. “ASAN xidmət indeksi” üzrə dövlət xidmətlərinin qiymətləndirilmə mexanizmi ancaq praktiki deyil, həmçinin elmi əsaslar nəzərə alınaraq hazırlanıb".

İnam Kərimov əlavə edib ki, Azərbaycanın 2 brendi ortaq layihəyə imza atıb. Belə ki, “ASAN Xidmət indeksi” üzrə qiymətləndirmə vasitəsilə dövlət xidmətlərini həyata keçirən şəxslərin peşəkarlıq səviyyəsinin ölçülməsi və inkişaf etdirilməsi, dövlət xidmətlərinin göstərilməsində şəffaflığın təmin olunması, dövlət xidmətlərinə nəzarət və şikayət mexanizmlərinin inkişaf etdirilməsi, dövlət xidmətlərinin səmərəliliyinin və keyfiyyətin yüksəldilməsi təmin ediləcək:

"Azərbaycan Respublikası Prezidentinin “Dövlət Xidmətlərinin Elektron Reyestrinin yaradılması ilə bağlı tədbirlər haqqında” 2014-cü il 11 sentyabr tarixli, 262 nömrəli fərmanına əsasən dövlət xidmətləri haqqında məlumatların vahid mənbədə toplanması və sistemləşdirilməsi, xidmətlərin göstərilməsində təkrarlığın aradan qaldırılması və yeni növ xidmətlərin yaradılması yolu ilə bu sahədə idarəetmənin çevikliyinin təmin edilməsi, xidmətlər üzrə təhlil və proqnozlaşdırma imkanlarının artırılması məqsədi ilə Dövlət Xidmətlərinin Elektron Reyestri yaradılıb və istifadəyə verilib. Hazırda 118 dövlət orqanı tərəfindən göstərilən 594 dövlət xidməti haqqında bütün məlumatlar Reyestrdə öz əksini tapıb. Bundan əlavə, yalnız mərkəzi və yerli icra hakimiyyəti orqanları deyil dövlət mülkiyyətində olan və paylarının (səhmlərinin) nəzarət zərfi dövlətə məxsus olan hüquqi şəxslər, dövlət adından yaradılan publik hüquqi şəxslər, büdcə təşkilatlarının xidmətləri də Dövlət Xidmətlərinin Elektron Reyestrində əks olunacaq və vətəndaşlar vahid mənbədən bütün dövlət xidmətlərinə çıxış əldə edəcəklər`.

Qeyd edək ki, “ASAN xidmət indeksi” üzrə qiymətləndirmə vasitəsilə dövlət xidmətlərini həyata keçirən şəxslərin peşəkarlıq səviyyəsinin ölçülməsi və inkişaf etdirilməsi, dövlət xidmətlərinin göstərilməsində şəffaflığın təmin olunması, dövlət xidmətlərinə nəzarət və şikayət mexanizmlərinin inkişaf etdirilməsi, dövlət xidmətlərinin səmərəliliyinin və keyfiyyətinin yüksəldilməsi təmin ediləcək.

Ölkə.Az