Ləman Ələşrəfqızı yeni vəzifəsindən danışdı

Əməkdar jurnalist Ləman Ələşrəfqızı "Azərxalça" ASC-də mətbuat katibi kimi fəaliyyətə başlamasıyla bağlı xəbəri təsdiqləyib.

Yeni işi barədə Ölkə.Az-a danışan jurnalist bunları deyib:

"Bəli, işə başlamışam. Sadəcə, bir iki texniki məsələlər var".

Ələşrəfqızı yenidən televiziya sahəsində fəaliyyət göstərmək ehtimalına da toxunub:

"Yaxın perspektivdə televiziyada fəaliyyət göstərəcəyim real deyil. Amma buradakı işim də jurnalistlərlə və jurnalistikayla bağlıdır. İstədiyim vaxt yaza bilərəm. Qələmimi əlimdən almayıblar ki".

Qeyd edək ki, xəbəri musavat.com saytı yaymışdı. Bildirilirdi ki, Azərbaycan prezidenti İlham Əliyev bu il mayın 5-də “Azərxalça” Açıq Səhmdar Cəmiyyətinin yaradılması haqqında Sərəncam imzalayıb. “Azərxalça” ASC Azərbaycan Respublikasında xalça və xalça məmulatlarının istehsalını, ixracını, onların ölkə daxilində və xaricdə satışının təşkilini, xalça və xalça məmulatlarının istehsalında yeni texnologiyaların tətbiqini, maddi-texniki bazanın müasirləşdirilməsini və ondan səmərəli istifadəni, habelə bu sahənin inkişafı ilə bağlı digər işləri yerinə yetirir.

Səhmləri dövlətə məxsus olan ASC-nin İdarə Heyətinin sədri Vidadi Muradovdur.

İntiqam VALEHOĞLU
Ölkə.Az