Çexiya yığmasının futbolçuları Azərbaycanla oyundan danışdılar
“Rəqibimizin 2 oyundan sonra 6 xal qazanacağını bilmirdik”.
Ölkə.Az Report-a istinadən xəbər verir ki, bunu Çexiya milli komandasının futbolçusu Patrik Şik Azərbaycan yığması ilə 2018-ci il dünya çempionatının seçmə qrup matçından öncə yerli jurnalistlərə açıqlamasında deyib.
Hücumçu ikinci pilləyə yaxınlaşmaq üçün qalib gəlmələrinin vacibliyini bildirib.
Onun komanda yoldaşı Filip Novak isə bildirib ki, Çexiya üçün 2 oyundan 1 xal kifayət deyil:
“Biz həvəsdən düşə bilmərik. Oyuna pozitiv əhval-ruhiyyədə köklənməli, qələbə qazanmalıyıq. Fikrimcə, azarkeşlərimiz də kömək edəcəklər və stadionda əla ab-hava yaranacaq”.
Qeyd edək ki, bu gün Ostrava şəhərindəki “Vitkovitse” stadionunda keçiriləcək Çexiya - Azərbaycan matçı Bakı vaxtı ilə saat 22:45-də başlanacaq.
