MSK bu seçki məntəqələrini buraxdı
Mərkəzi Seçki Komissiyası (MSK) sentyabrın 26-da Azərbaycanda keçirilmiş ümumxalq səsverməsi ilə əlaqədar referendumun yekun nəticələrini elan edib.
Ölkə.Az saytının məlumatına görə, bu barədə MSK-nın bu gün keçirilən iclasında bildirilib.
İclasda çıxış edən MSK sədri Məzahir Pənahov bildirib ki, rəhbərlik etdiyi qurum sentyabrın 26-da Azərbaycanda keçirilmiş ümumxalq səsverməsi (referendum) ilə əlaqədar səsvermənin təşkili üçün üzərinə düşən vəzifəni yerinə yetirib:
“Səsvermə günü səsvermə çox rəvan olub. Azərbaycan mətbuatının referendumla bağlı prosesdə hər hansı qanun pozuntusuna yol verməsi halına rast gəlinmədi. Bu, həm jurnalistlərinin peşəkarlığı, həm də seçki subyektlərinin maariflənməsi ilə bağlıdır”.
M.Pənahov seçki prosesində polisin fəaliyyətini də yüksək qiymətləndirib:
“Polisin fəaliyyəti ilə bağlı hər hansı irad olmayıb. Ən qərəzli müşahidəçilərin hesabatlarında da seçki prosesində hakimiyyət resurslarından istifadə olunması barədə ifadəyə rast gəlinmir. Bir vaxtlar irad kimi səslənən bu ifadə artıq yaddan çıxıb. Azərbaycan seçki proseslərində ən inkişaf etmiş Avropa ölkələrinin heç birindən geri qalmır. Vətəndaşlarımız da ölkəsi ilə fəxr edir”.
Daha sonra iclasda çıxış edən MSK katibi Arifə Muxtarova bildirib ki, sentyabrın 26-da Azərbaycanda keçirilmiş ümumxalq səsverməsi (referendum) ilə əlaqədar 3 seçki məntəqəsində seçkinin nəticələri tam ləğv edilib:
“1 seçki məntəqəsində isə seçki nəticələri qismən ləğv olunub. Bununla da 11 saylı Qaradağ Seçki Dairəsinin 14 saylı seçki məntəqəsi, 12 saylı Qaradağ-Binəqədi-Yasamal Seçki Dairəsinin 10 saylı seçki məntəqəsi, 68 saylı Cəlibadad kənd Seçki Dairəsi 2 saylı seçki məntəqəsində seçkinint nəticələri tam, 64 saylı saylı Sabirabad Seçki Dairəsinin 35 saylı seçki məntəqəsində seçkinin nəticələri qismən ləğv edilib”.
İclasda MSK tərəfindən Azərbaycan Respublikasının Konstitusiyasında dəyişikliklər edilməsi məqsədi ilə sentyabrın 26-da keçirilmiş ümumxalq səsverməsinin (referendum) yekun nəticələrinin təsdiqlənməsi ilə bağlı qərar qəbul edilib.
Qərarda bildirilir ki, Azərbaycan Respublikasının Konstitusiyasında dəyişikliklər edilməsi məqsədi ilə sentyabrın 26-da keçirilmiş ümumxalq səsverməsinin (referendum) yekun nəticələri təsdiq edilir, qərar dərc edildiyi gündən qüvvəyə minir.
Mərkəzi Seçki Komissiyası 2016-cı il sentyabrın 26-da Azərbaycanda keçirilmiş ümumxalq səsverməsi (referendum) ilə əlaqədar 6 seçki məntəqəsində seçki komissiyalarının buraxılması ilə bağlı qərar qəbul edib.
Ölkə.Az-ın məlumatına görə, həmin komissiyalar 11 saylı Qaradağ Seçki Dairəsinin 14 saylı seçki məntəqəsi, 12 saylı Qaradağ-Binəqədi-Yasamal Seçki Dairəsinin 10 saylı seçki məntəqəsi, 68 saylı Cəlilabad kənd Seçki Dairəsi 2 saylı seçki məntəqəsi, 64 saylı Sabirabad İkinci Seçki Dairəsinin 35 saylı seçki məntəqəsi, 15 saylı Yasamal Birinci Seçki Dairəsinin 21 saylı seçki məntəqəsi və 19 saylı Nərimanov Birinci Seçki Dairəsinin 4 saylı seçki məntəqəsinin seçki komissiyalarıdır. Sözügedən komissiyalar səsvermənin təşkilində yol verilmiş nöqsanlara görə buraxılıb.
Zaur Əziz
Ölkə.Az
