Şeyx qan verdi

Qafqaz Müsəlmanları İdarəsinin sədri (QMİ) hacı Allahşükür Paşazadə Aşura günü ilə əlaqədar bu gün “Təzəpir” məscidində qan verib.

“Ölkə.az”-ın məlumatına görə, qanvermə aksiyasında Bütün Qafqazın Şeyxi ilə bərabər, Azərbaycan Respublikasının millətlərarası, multikulturalizm və dini məsələlər üzrə Dövlət müşaviri Kamal Abdulla, Dini Qurumlarla İşü zrə Dövlət Komitəsinin sədri Mübariz Qurbanlı, Milli Məclisin İctimai birliklər və dini icmalar komitəsinin sədri Siyavuş Novruzov, millət vəkilləri – Cavanşir Paşazadə, Hüseynbala Mirələmov,

Azərbaycan Dağ Yəhudiləri icmasının sədri Milix Yevdayev və digər şəxslər iştirak edib.

Xatırladaq ki, Aşura günü ilə əlaqədar bu gün səhər saatlarından qanvermə aksiyası başlayıb.

QMİ Aşura günündə 14 məscid və ziyarətgahda qanvermə aksiyası keçirir. Bunlar Yasamal rayonu “Təzə-pir” məscidi, Yasamal rayonu “Hacı Soltanəli” məscidi, Nəsimi rayonu “Əjdərbəy” məscidi, Səbail rayonu “Bibi-Heybət” məscidi, Səbail rayonu "İçərişəhər cümə məscid"i, Suraxanı rayonu "Qaraçuxur" məscidi, Xəzər rayonu “Mir Mövsüm ağa” məscidi, Nizami rayonu "Keşlə qəsəbə məscid"i, Sumqayıt şəhər “Cümə” məscidi, Gəncə şəhər “İmamzadə” məscidi, Mingəçevir şəhər “Heydər” məscidi, Şəki şəhər “Cümə” məscidi, Lənkəran şəhəri "Böyükbazar" məscidi və Bərdə şəhər “Cümə” məscididir.

Zaur Əziz