Eyyub Hüseynov: "Səhiyyə nazirliyi nəyə gəldi sertifikat verir"
Azərbaycanda yeyinti məhsulları üçün sertifikatın alınmasına görə dövlət rüsumlarının yalnız bank, poçt, plastik kart, elektron ödəmə sistemləri və ya internet vasitəsilə ödənilməsi tələbi qoyulacaq.
Milli Məclisin mətbuat xidmətindən verilən məlumata görə, bu məsələ Azərbaycan prezidenti tərəfindən parlamentə daxil olmuş “Yeyinti məhsulları haqqında” qanuna dəyişikliklər edilməsi barədə yeni qanun layihəsində öz əksini tapıb. Bəs ümumilikdə ölkədə qida təhlükəsizliyinə olan nəzarət nə vəziyyətdədir?
Ölkə.az-ın bu məsələ ilə bağlı suallarınıAzad İstehlakçılar Birliyinin sədri Eyyub Hüseynov cavablandırıb:
"Çox təəssüf olsun ki, ölkədə qida, ərzaq təhlükəsizliyi, qida təhlükəsizliyi və keyfiyyətini müəyyən edən hər hansı bir qanun yoxdur. Hazırda Avropa İttifaqı belə bir qanun hazırlayıb. Əgər ölkədə hər hansı bir qida zəhərlənməsi baş verərsə, heç bir dövlət orqanının buna müdaxilə mexanizmi yoxdur. Ölkədə istehlakçı problemləri ikinci plandadır. Mövcud olan qanunvericilikdə idarəetmə mexanizmi olduqca zəifdir. Bu gün satışdan çıxarılan təhlükəli qidalar müxtəlif yollarla yenidən istehlakçıya satılır.
Bu tip problemlərin həllini qanunlarda axtarmaq lazımdır. İlk olaraq qida təhlükəsizliyi haqqında qanun qəbul edilməlidir. Təhlükəli qidanı tez bazardan çıxartmaq üçün hazır komanda olmalıdır, ancaq belə bir komanda da yoxdur. Üstəlik öncədən xəbərdarlıq, təhlükəli qidanın geri çağırılma mexanizmi olmalıdır ki, bunların heç biri ölkədə mövcud deyil. Hazırda bu mövzuda ən ciddi problemlər şadlıq evləri və restoranlarda yaşanır.
Ümumdünya Səhiyyə Təşkilatının tətbiq etdiyi uzunömürlülər siyahısında azərbaycanlılar uzunömürlülər siyahısında yer almayıb. Azərbaycanda qida zəhərlənməli dünya ölkələri ilə müqayisədə daha çoxdur. Ən böyük məsuliyyət Səhiyyə, İqtisadiyyat nazirliklərinin üzərinə düşsə də, Səhiyyə nazirliyi hazırda hər şeyə sertifikat verir.
Azad İstehlakçılar birliyi ABŞ inkişaf agentliyinin dəstəyi ilə qida təhlükəsizliyi nişanını qeydiyyatdan keçirir ki, bu da dünyada ilk təcrübədir. Təhlükəsizlik qida istehsal edən müəssisələrə həmin nişanı şamil edirik. Bu illər ərzində Azərbaycanda bu təhlükəsiz qida nişanına sahib olan cəmi 5 müəssisə buna layiq görülüb".
Qeyd edək ki, qanuna ediləcək yeni dəyişikliyə görə, istifadə müddəti keçmiş yeyinti məhsullarının dövriyyədən çıxarılması, habelə yeyinti məhsullarının keyfiyyətinin və təhlükəsizliyinin təmin edilməsində standartlara və tələblərə əməl olunmasına görə dövlət nəzarətinin həyata keçirilməsi, insanların həyatı və sağlamlığına təhlükə törədə biləcək halların aşkarlanması sahəsində işlər həyata keçiriləcək.
Fatimə İbrahimova
Ölkə.az
