\"Bəzən tapşırırlar ki, gəlin soruşanda qiymətini baha de\"

Ölkə.Az müxtəlif peşə sahibləri ilə bağlı silsilə yazılara davam edir.

Bu dəfəki müsahibimiz zərgər Fərhad Əsgərovdur.

- Zəhmət olmasa, biraz özünüzdən danışın.

- 2002-ci ildən bu işlə məşğulam. Zərgərliyə həmişə həvəsim olub. Uşaqlıqdan rəssamlığı bacarırdım, həm də çox sevirdim. Həvəslə yanaşdığım üçün də vaxtından tez öyrənmişəm. Təbii ki, bu iş elədir ki, hər gün, ölənə kimi öyrənirsən. Türkiyədə və burda çox yerdə çalışmışam. Hal-hazırda isə Mərkəzi Univermaqda işləyirəm.

- Adətən modelləri kim verir?

- Öz fantaziyamızla da düzəldirik. İsənilən brend modelin eynisini də düzəldirik. Adətən şəklini gətirirlər. Hansısa filmdə və ya reklamda görüb bəyənirlər, eynisini düzəldirik. Onları satışa çıxarmırıq, yalnız müştərinin sifarişi ilə düzəldirik.

- Zərgərə istənilən modeli yığdırmaq olar yəni...

- Əlbəttə. Şəklini gətirmək və ya modelin adını demək kifayətdir. Əksər müştərilərin də istəyi budur ki, məndə olan heçkimdə olmasın.

- Xarici brendlərin üstünlüyü nədədir bəs?

- Heç bir üstünlüyü yoxdur. Bizim insanlarda belə düşüncə var ki, bu xaricdən gəlibsə, demək yaxşıdır. Daşın çıxışı eynidir. Hindistandan və Belçikadan gəlir. Cilalanma emalatxanası Belçikadadır. Avadanlıqlar brend firmalarda və bizdə eynidir. Biz də onlar kimi lazerlə yapışdırırıq, liço edirik, 3D matrikslə işləyirik, mikroskopla bərkidirik. Amma bizim xalqda belə inam var ki, başqa yerdən gələn daha dəyərli hesab olunur. Əslində isə heç bir fərqi yoxdur. Gördüyünüz bu lazer aparatı ən son modeldir və bir il yoxdur ki sərgidən gətirmişəm. İtaliyalı da bizim kimi bununla yapışdırır. 2018-ci ildə yeni model çıxsın, yenisini alıb gətirəcəyik.

- Belə çıxır ki, hər hansısa brend mağazadan alınan zinət əşyası ilə zərgərin hazırladığı zinət əşyası arasında heç bir fərq yoxdur?

- Bəli, fərq ondadır ki, firma sadəcə öz qiymətini əlavə edir ora. Dünyanın hər yerində eyni düsturla hazırlanır.

Qızıl keyfiyyət baxımından fərqlənirmi deyə maraqlanıram. Müsahibim heç bir fərq olmadığını deyir:

- Hamısı keyfiyyətlidir. Misal üçün 750 əyyar o deməkdir ki, onun bir qramında qızıl tərkibi 750-dir. 583 də həmçinin. 999 əyyar isə təmiz qızıl hesab olunur. Təmiz qızıldan da qeyri-adi model düzəltmək çox çətindir, çünki çox elastik olurlar. Gərək o qədər qalın düzəldəsən ki, müştərinin əlində əyilməsin. Misal üçün, dişləyəndə izi qalır. Filmlərdə də görmuş olarsınız, təmiz qızıl çox yumşaq olur. Daşlar isə keyfiyyətinə görə, parıltısı və içinin təmizliyinə görə fərqlənir. Bahalı daşların içində duz, kömür olmur.

Bizə icazə verilmir ki, biz də sərgiyə çıxaq, məhsullarımızı göstərək. Biz də brend kimi hansısa ölkələrdə tanınaq. Ancaq başqa ölkələrdə sərgiyə gedirəm.

Azərbaycan brendi iki dənədir. Onlar da ya Dubayda, ya da Türkiyədə fəaliyyət göstərir. Azərbaycanda heç bir fabrik və ya sex yoxdur. Sadəcə burada istehsal edib xaricə çıxarda bilmirlər deyə xaricdə işləyirlər.

- Sizə daha çox qadınlar müraciət edir, yoxsa kişilər?

- Qadınlar çox olur. Kişilər adətən sürprizlər üçün müraciət edirlər.

Soruşuram ki, qadınların kaprizləri olurmu? Sualımı gözləyirmiş kimi:

- Olur da sözdür? Ürəyimizi partladırlar (gülür). İstirahətə gedəndə də zəng edirlər. Qadınlar belədir də. Eyni bəzək əşyasına eyni sözləri təkrar-təkrar deyirlər. Adətən toya hazırlaşan cütlüklər gəlir. Çünki bizdə belədir ki, mütləq kreditlə də olsa toya qızıl alınmalıdır. Hərdən alırlar, pulunu toydan sonra verirlər. Hər adama da borca verə bilmirik, yalnız tanıdığımız insanlara.

Bəzən də elə olur ki, qoyulmuş vaxtda çatdıra bilmirik. Çünki müştəri gedir bütün qızıl dükanlarını gəzir, görür ki, elə eyni mala ən sərfəli qiymət bizdədir. Toydan 3 gün qabaq gəlir, tez-tələsik sifariş verir.

- Bir zinət əşyasının dəsti neçə günə hazır olur?

- Bu, modeldən asılıdır. Əgər hazır qəlibi olarsa, bir günə də hazır olar, yoxdursa, təxmini bir həftəyə. Bəzən tapşırırlar ki, gəlin soruşanda qiymətini baha de. Misal üçün, bir manatlıq şey alıbsa təlimatlandırır ki, gəlin soruşanda deyin ki, beş manatdır. Biz də deyirik beş manatdır.

- Yəni yalan danışmağa vadar edirlər?

- Şirin yalandır bu, ev yıxan yalan deyil (gülür). Əslində beş minə olmasa da, ən azından gəlin də ruhlanır ki, mənə beş minlik mal alırlar.