Dəqiq bilirəm ki, FƏTÖ-çuların siyahısında mənim adım yoxdur
15 iyul Türkiyədə hakimiyyət çevrilişinə cəhddən sonra rəsmi Ankara ilə Fətullah Gülən təşkilatı arasında açıq şəkildə mübarizə başladı.
FƏTÖ təşkilatı adı verilən nurçulara qarşı Türkiyədə saysız-hesabsız əməliyyat keçirildi. Dünyanın bir çox ölkəsində kök salmış FƏTÖ təşkilatının Azərbaycanda da dayaqları var.
Son günlər yayılan məlumatlara əsasən, Türkiyə hökuməti Azərbaycana FƏTÖ-çuların siyahısını verib. Siyahıda bir neçə deputatın da adı olduğu bildirilir.
Yayılan bu məlumatla bağlı millət vəkili Araz Əlizadə Ölkə.Az-a danışıb:
"Dəqiq bilirəm ki, o siyahıda mənim adım yoxdur. Türkiyə hökuməti əgər FƏTÖ-çuların siyahısını göndəribsə, onu xüsusi xidmət orqanlarımıza verib. Milli Məclisdə nurçuların olub-olmamasını deyə bilmərəm. Mənim bildiyim bir şey var, insan öz vətəninə, dövlətinə, millətinə sadiq olmalıdır. Heç vaxt maraqlanmıram ki, kim kimin yanındadı, kimlə əlbirdir. Bunlar məni maraqlandırmır. Nurçudular özləri bilərlər, mən azərbaycançıyam.
Xüsusi xidmət orqanlarının işi odur ki, araşdırsın görsün kim hansı məzhəbə qulluq edir. Məlumatın Türkiyədən gəlməsini gözləməyin mənası yoxdur".
Səxavət Məmməd
