Siçovulu edam etdirən rus çarı kim olub?
Bir çox insanın əyləncəsi, hobbisi onun əsas peşəsinə aid olmur. Günümüzdə hobbisi olmayan insan təsəvvür etmək mümkün deyil. Eləsi var ki, qədim sikkə, antik əşya həvəskarıdır. Elə adamlar da var ki, poçt markası, xarici dövlətlərin pul vahidlərinin kolleksiyası ilə məşğuldur. Bu siyahını kifayət qədər uzatmaq olar. Dünya tarixində iz qoymuş məşhur şəxslərin də qəribə kolleksiyaları, hobbiləri olub.
Ölkə.Az bu gün oxuculara rus çarlarının əyləncələri haqda qısa məlumat verəcək.
1-Məsələn rus çarı İvan Qroznı astrologiya ilə ciddi surətdə maraqlanırdı. Onun sarayında ingilis astroloq Yelisey Bomeley yaşayırdı. Astronom çar üçün qoroskoplar tərtib edir, astronomiya elminin sirlərini öyrədirdi.
Amma qeyd etmək lazımdır ki, ingilis alim saray intriqalarında yer aldığı üçün 1575-ci ilin 5 avqust tarixində edam edilib. İvan Qroznı isə şahmat masası arxasında keçinib. Şahidlərin dediyinə görə, çar bir neçə dəfə yıxılan kral fiqurunu yerinə qoya bilmirmiş.
2-Çar Aleksey Mixayloviçin sevimli əyləncəsi isə ov olub. O dövrdə çarın ovda istifadə etdiyi şahin quşlarına qulluq etmək çox şərəfli bir peşə sayılırdı.
3-Böyük reformator Birinci Pyotrun əyləncə və hobbilərinin sayı-hesabı olmayıb. Dövlət başçısı gəmi inşa edir, çəkmə tikir, saray əyanlarının dişini çəkirdi. Çar hətta çarıq toxumağa cəhd etsə də, bu işin öhdəsindən gələ bilməmişdi.
4-Çar 3-cü Pyotr isə əsgər-əsgər oynamağı xoşlayırdı. Bir dəfə sarayın altında yuva quran siçovul onun əsgər oyuncaqlarından ikisini yemişdi. Nişastadan hazırlanmış əsgərini itirən çar siçovulu tutub edam etməyi əmr etdi. Saray cəlladı siçovulu tutaraq asdı.
5-Rus çarı 1-ci Nikolay ağır dövlət işlərindən dincəlmək istəyəndə ordu üçün mundir eskizləri üzərində işləyirdi. İmperator bu işə o qədər aludə olmuşdu ki, bəzən sutkalarla hərbi forma eskizləri üzərində işləyə bilərdi.
6-Çar 3-cü Aleksandr ova, xüsusən də balıq ovuna vurğun idi. 20 yaşı olanda o, ayı ovu ilə məşğul olurdu. 1894-cü ildə ov zamanı ciddi soyuqlayan çar nefrit xəstəliyinə düçar oldu. Həkimlərin təkidi ilə Krıma müalicəyə yollanan Aleksandr 1894-cü ilin 20 oktyabr tarixində vəfat etdi.
7-Rus imperatoru 2-ci Nikolay isə tennis oynamağı, skripka çalmağı və odun doğramağı çox xoşlayırdı. 1918-ci ildə ailəsi ilə birlikdə Yekatrinburqda nəzarət altında yaşayan keçmiş çar sevimli məşğuliyyətlərindən uzaq qaldığı üçün dərd çəkirdi.
Hikmət
