AXCP sədri Razi Nurullayevdən banklarla bağlı təklif
“Azərbaycanda bankların sağlamlaşdırılması mümkün deyil. İnzibati yolla bank sağlamlaşa bilməz. Bank sisteminə, onun idarə olunmasına, birinci növbədə Azərbaycan mentaliteti və iqtidar yanaşması dəyişməlidir. Bunu dəyişdirmək, beyinlərdən silmək mümkün deyil”.
Ölkə.Az xəbər verir ki, Azərbaycan Xalq Cəbhəsi Partiyasının (AXCP) sədri Razi Nurullayev ölkədə bank siteminin vəziyyətinə münasibət bildirib. Sədr bildirib ki, Azərbaycanda banklar özlərinə "krişa" tapıb əhalinin cibinə girmək, onlardan daha çox qazanmaq, rüşvətlə işləmək prinsipi ilə fəaliyyət göstərirlər:
“Hakimiyyətin yaratdığı abu-hava budur. Problemlər zəncirvari şəkildə bir-birinə bağlıdır. Hakimiyyət inzibati yolla bunu həll edə bilməyəcək, çünki banklar hələ də biznesmen təfəkkürü ilə idarə olunmur. Banklar hələ də ayrı-ayrı məmurlara məxsusdur. Arxasında dayanan güclü əllər var.
Amma əslində bu hal kütləvi olsa belə bank sisteminin inkişafına maneçilik törətməyə bilər. Təki bankı normal insanlar idarə etsin və sınaqdan çıxmış xarici təcrübə tətbiq edilsin. Belə kiçik araşdırma apardım və gördüm ki, xarici bankların paya sahib olduğu və idarəçiliyində iştirak etdiyi yerli banklarda ciddi problemlər yoxdur.
Azərbaycandakı banklara alman, yapon, koreya təfəkkürü lazımdır. Elə buna görə də bankların idarə olunmasına almanları, yaponları və koreyalıları dəvət etmək vacibdir. Bu bankların müəyyən hissəsinin onlara satılması və eyni zamanda o ölkələrdən olan güclü bank idarəçilərinin cəlb edilməsi lazımdır. Amerikalı və avroplalıların bank sistemimizin müəyyən hissəsinə yiyələnməyə imkan vermək olmaz fikri höküməti həmişə narahat edib. Çünki, müəyyən məqamlarda bu ölkəyə siyasi təzyiq kimi istifadə edilə bilər. Amma, inanmıram ki, almanlar, yaponlar və koreyalılar belə etsin. Yapon və koreyalıların Azərbaycanda siyasi maraqları yoxdur, almanlar isə heç zaman biznesə xəyanət etmirlər”.
Razi Nurullayev qeyd edib ki, bu gün Azərbaycanda müştəri təhlükəsizliyini təmin edə biləcək bank yoxdur:
“Keçid alaq əsas mahiyyətə: neft Fondunda 35 milyarddan artıq vəsait toplanıb. Onlar, əsasən Qərb ölkələrinin banklarına yatırılıb və varlı avroplalıları daha da zənginləşdirir, kasıb azərbaycanlıları daha da müflisləşdirir. Bəli, indiki məqamda qana susayan banklarımıza o pulların qəpiyini də qoymaq olmaz. Amma, əsas menecment heyəti almanlar, yapon və koreyalılar olan banklara qoymaq olar. Güclü mütəxəssisləri, idarəçiləri yüksək əmək haqqı müqabilində ölkəyə cəlb edək və o 35 milayrd vəsaiti bizim banklar vəsitəsilə idarə edək. Amma, alman, yapon və koreyalı düşüncəsi ilə. Bu üsul tətbiq olunarsa, 5 ildən sonra Azərbaycanın kürəyi yerə gəlməz.
Bu, sadəcə mənim ilkin versiyamdır, üzərində daha da dolğun işləyib dəyərli bir konsepsiya ortaya çıxarmaq olar”.
