23 ton yararsız bal yarmarkadan çıxarıldı
Bakıda bal sərgi-satış yarmarkası davam edir.
Ölkə.Az xəbər verir ki, Kənd Təsərrüfatı Nazirliyi yanında Dövlət Baytarlıq Nəzarəti Xidmətinin mətbuat katibi Yolçu Xanvəli Lent.az-a açıqlamasında bildirib ki, yarmarkaya satış üçün bal gətirən 53 nəfərin balı yararsız olduğu üçün satışdan çıxarılıb.
Y. Xanvəlinin sözlərinə görə, 15 oktyabr -15 noyabr tarixlərində Bakı şəhərində keçiriləcək arıçılıq məhsullarının sərgi-satış yarmarkasına çıxarılacaq məhsullardan götürülmüş laboratoriya nümunələrinə əsasən ümumilikdə 23 ton məhsul satış üçün yararsız qiymətləndirilib: “ 53 nəfərin sırasında 13 nəfərin məhsulu qismən yararsız, yerdə qalan 40 nəfərin məhsulu isə tam yararsız vəziyyətdə olub. Ümumilikdə 23 ton bal məhsulu satışdan çıxarılıb”.
Qeyd edək ki, bu il yarmarkaya ümumilikdə 93 ton bal gətirilib. Müxtəlif bölgələrdə arıçılıq təsərrüfatı ilə məşğul olan fermerlər öz məhsullarını yarmarkada satışa çıxarıblar. Yarmarka noyabr ayının 15-ə qədər davam edəcək.
