\"Kürdlər xaincəsinə hücum edib Mosuldakı türkmən kəndlərini işğal edə bilərlər\"

2014-cü ildən İŞİD terrorçularının nəzarətində olan İraqın Mosul şəhərini azad etmək üçün hərbi əməliyyatlar başlayıb.

ABŞ və Fransa qırıcılar vasitəsi ilə İŞİD-in dayaq məntəqələrini vuracaq. Bundan əlavə ABŞ-ın artileriya qüvvələri də əməliyyatlarda fəal iştirak edəcək.

Mosul əməliyyatında qurudan əsasən İraq qoşunlar iştirak edəcək. Əməliyyat zamanı Bərazninin rəhbərlik etdiyi peşmərgələrin də iştirakı gözlənilir. Peşmərgələrin əməliyyatda iştirakına görə bəzi ekspertlər iddia edir ki, Mosul kürdlərin əlinə keçə bilər.

Mosul əməliyyatı ilə bağlı politoloq Qabil Hüseynli Ölkə.Az-a danışıb:

"Mosul əməliyyatına əsas rəhbərliyi İraq hökuməti edir. Mosula hücum edəcək qüvvələrin hamısı İraq hökumətinin sərəncamındadır. Mosul İŞİD-dən təmizləndikdən sonra Mosulun əvvəlki etnik və dini tərkibinin qorunub saxlanılması haqqında qabaqcadan müqavilə imzalanıb. Bu müqavilə İraq hökuməti ilə sünni, şiə və Məsud Bərzaninin peşmərgələri arasında imzalanıb.

Mosul sünni şəhəri olsa da, orada şiələr də var. Mosuldakı türkmənlərin bir hissəsi sünni, bir hissəsi isə şiədir. Ancaq onlar azlıq təşkil etdiyi üçün heç bir məhzəb ayrılığı olmadan yaşayırlar. Türkiyə də israrla tələb edir ki, Mosulun əvvəlki etnik tərkibi qorunub saxlanılsın. İraq hökuməti də bu fikirdədir. Düzdür, İraqın şimalındakı muxtariyyətin təmsilçiləri, yəni kürdlər Mosulun kürd şəhəri olduğunu iddia etsələr də, bunun heç bir əsası yoxdur. Mosul əvvəldən sünnilərin mərkəzi olub. Səddam Hüseynin dövründə də İraq hökumətinin əsas dayağı Mosul və Tiqrit şəhəri idi.

Peşmərgələr əməliyyatın əsas hissəsində iştirak etməyəcək. Onlar yalnız yardımçı funksiyaları yerinə yetirəcəklər. ABŞ hökuməti də bununla razılaşıb. Əsas hücumu hazırda ABŞ-ın artileriya qruplaşmaları həyata keçirir. Bu artileriya qruplaşmaları İŞİD-in əsas qərargahlarının, komanda mərkəzlərinin sıradan çıxarılmasında böyük rol oynayır. Mosul əməliyyatında xüsusi hazırlıq keçmiş İraq komandaları əsas funksiyalardan birini yerinə yetirəcək. Onların fikirləri İranın təsirində olan şiə polisləri şəhərə buraxmamaqdır. Çünki bundan əvvəl şiə polislər Əndar şəhərində sünnilərə qarşı çox böyük zülmlər edib, sünni əhalini qırmışdılar. İndi onlara Mosul əməliyyatında həlledici yer verilməyəcək. Bunu Türkiyə də, Səudiyyə Ərəbistanı da tələb edir, ABŞ da bununla razıdır.

Beləliklə İŞİD-in İraqdakı paytaxdı olan Mosul terrorçu qruplaşmanın əlindən azad edildikdən sonra onun əsas rəhbərləri ya məhv ediləcək, ya da həbs ediləcək. Bundan sonra danışıqlar stolu arxasında İraq, Türkiyə, Səudiyyə Ərəbistanı və İraqın şimalındakı kürd muxtariyyətinin rəhbərliyi Mosulun idarə edilməsi, əhalinin məskunlaşması və müharibədən sonrakı digər məsələləri gündəmə gətirəcəklər.

Kürdlərin nə qədər iddia etməsinə baxmayaraq, İraq hökuməti artıq kifayət qədər güclüdür. Eyni zamanda, İraq və Bərazinin peşmərgələri Türkiyə hökumətini eşidir və Türkiyənin maraqlarını nəzərə alır. Güman edirəm ki, həmin ərazidə kifayət qədər türk qoşunları da var. Artıq türkmənlərin Fatih Sultan adında batalyonları var ki, onlar da yeri gələndə türkmən xalqının maraqlarını qorumaq iqtidarındadır. Kürdlərin Mosulla bağlı iddiaları zənnimcə həyata keçməyəcək. Kürdlər ola bilsin ki, xaincəsinə hücum edib Kərkükdəki türkmən kəndlərini işğal etdikləri kimi, Mosuldakı türkmən kəndlərini də işğal etsinlər. Hər halda Bərzani ilə həm İraq hökumətinin, həm də Türkiyənin xüsusi razılaşmaları var. Bərzani bu razılaşmalara əməl etməzsə, onun muxtariyyəti üçün ciddi təhlükə yaranacaq və Türkiyə ilə yaxın münasibətlər pozula bilər.

Bu gün əsas məsələ İŞİD-in sıradan çıxarılmasıdır. Mosuldan sonra Suriyada Rakka şəhərinin terrorçulardan təmizlənməsidir. Rakka şəhərinin alınmasında Türkiyə və Suriya Azadlıq Ordusu yaxından iştirak edəcək. Bir sözlə, İŞİD-in məhv edilməsində böyük rol oynadığına görə Türkiyə danışıqlarda əsas söz sahiblərindən biri olacaq. Bu məsələdə İraq və Suriya hökumətləri ilə ciddi surətdə əməkdaşlıq edəcəkdir.

Bölgədə milli nifaq yaradan səbəblərin ərsəyə gəlməsinə imkan verilməməsi nəzərdə tutulur. Bunun da əsas qarantı Türkiyə, müəyyən qədər də İraq hökuməti olacaq".

Səxavət Məmməd
Ölkə.Az