"Bakının infrastrukturu çöküb, vəziyyət xaotikdir"
“İndi hər bir ailəni ən çox narahat edən məsələlərdən biri də istilikdir. Qızıl teştdə otursan belə, istilik yoxsa həyat da yoxdur. Hər kəsin evində ya körpə uşaqları, qocası və xəstəsi mütləq ki, var. Soyuqlar düşən zaman vətəndaşları istilik qayğısı üzməyə başlayır. Soyuq düşən kimi, şəhər infrastrukturu çökür: qazın təzyiqi aşağı düşür, işıqlar tez-tez sönür, bəzi yerlərdə işıq gərginliyi o qədər zəifdir ki, insanlar kondisionerləri də işlədə bilmirlər. İşıq gücləndirici almaq üçünsə, ən azı 250-1500 azn arası pul xərcləmək lazımdır. Kasıbda bu pul hardandır?”
Ölkə.Az xəbər verir ki, bu sözləri Azərbaycan Xalq Cəbhəsi Partiyasının sədri Razi Nurullayev deyib. Sədr vəziyyətin acınacaqlı olduğunu bildirərək, səbəblər və çıxış yollarını göstərib:
“Məsələyə üç prizmadan yanaşaq. Birincisi, bina evlərinin istilik sistemi ilə bağlı məsələdir. Dünyanın ən gözəl, ən təmiz və ən səliqəli şəhəri olan Bakıda 3140 hündürmərtəbəli bina istiliklə təmin edilir. Bunun 30-40%-i sadəcə statistik göstəricidir. Çünki, elə binalar var ki, istilik bir saat verilir, bir sutka kəsilir. Yaxud, binaya 30 dərəcəyə qədər istilik belə gəlib çatmır. Amma, yüzlərlə belə binalar da "AzərİstilikTəchizat" tərəfindən istiliklə təmin olunan 3,140 binanın siyahısına salınır.
Bakıda neçə hündürmərtəbəli (2-3 mərtəbəli binaları da nəzərdə tuturam) bina var? Hərçənd ki, 7-8 mindən az olmaz. Bəs, yerdə qalan binaların sakinləri donub ölsünlər? Bunun, subyektiv səbəbi də var. İnsanlar binadaxili istilik sistemlərini məhv ediblər. Amma, daha onlar məhv ediblər deyə, soyuqdan ölməlidirlər? Dövlət hesabına binadaxili xətlər bərpa olunsun, vətəndaşlar isə zəhmət çəkib öz mənzillərinin problemlərini həll edərlər. Mənim üçün vətəndaşların qışda istiliklə təmin olunması strateji məsələdir və hökumətin bu məsələyə laqeyd yanaşması başadüşülən deyil. Mən, "AzərİstilikTəchizat"ı da birmənalı günahlandırmağın tərəfdarı deyiləm. Dövlət büdcəsindən, vəsait ayrılmalı və "AzərİstilikTəchizat" ASC-də konkret tələb qoyulmalıdır. Bəlkə də, ayrılır, biz bilmirik, amma bu məsələyə ayrıca Prezident müşavirəsinin həsr olunması zərurətə çevrilib”.
AXCP sədri bildirib ki, ikinci problem fərdi evlərin tikintisi zamanı baş verən qanunsuzluqlardır:
“Fərdi evlərin tikilməsi zamanı hər kəsə bəllidir ki, hansı qanunsuzluqlar baş verir. İcra hakimiyyətləri vətəndaşa ev tikmək üçün rüşvət müqabilində icazə verir və bununla da işi bitmiş olur. Nə onlar, nə də bələdiyyələr səliqə-sahmana, qayda-qanunlara, infrastruktur yaradılmasına, yanğın məsələlərinə və yol infrastrukturuna fikir verirlər. İnsanlar, ibtidai-icma quruluşunda olduğu kimi xaotik şəkildə məskunlaşırlar. Artıq belə yerlərdə mərkəzləşmiş istilik sisteminin qurulması belə çətin ki, mümkün olsun. Vətəndaş isə, borc-xərclə başı üzərində bir qaraltı qura bilib. Amma, evini necə qızdırsın? Sual ritorik ola bilər. Amma, hökumət bu kimi məsələdə də məsuliyyət daşıyır. Hər kəsin kombi sistemi qurmağa imkanı yoxdur, kombi aparatının yalnız özü minimal olaraq 700 azn-dən başlayır. 3 otaqlı evə isə kombi sisteminin çəkilməsi toplam olaraq, ən azı 1500 azn-ə başa gəlir. Azərbaycanda nə qədər ailə var ki, bu məbləği ödəyə bilsin? Əvvəllər banklardan kredit götürüb bunu pis-yaxşı edirdilər. Amma, indi kredit də verilmir və kredit götürənlər də bankların girovuna çevrilib. Belə halda nə etməli?”
Razi Nurullayev problemin səbəblərindən birinin də sosial iaşə obyektləri, dövlət idarələri, məktəb və xəstəxanaların istilik sistemi ilə pis təchiz olunması olduğunu deyib:
“Burada ən pis vəziyyət əyalət məktəblərindədir. Çünki, məktəblərə verilən yanacaq, odun və digər ləvazimatlar, materiallar oğurlanır, yeyilir və talanır. Əgər təhsil naziri Mikayıl Cabbarov bunu bilmirsə, onda demək ki, idarəçilikdə problem var. Zəhmət çəkib ayağını ucqar kənd məktəblərinə salsın. Əyalət məktəbinə xəbərdarlıq etmədən getsin və gözləri ilə acınacaqlı mənzərənin şahidi olsun”.
AXCP sədri sonda vurğulayıb ki, prezident qışa hazırlıq, istilik, şəhər infrastrukturunun hazırlığı ilə bağlı təcili müşavirə keçirməlidir, vəziyyət bu şəkildə davam edə bilməyəcək”.
