İlham Əliyev növbədənkənar prezident seçkilərindən danışdı
Azərbaycanda növbədənkənar prezident seçkilərinin keçirilməsi planlaşdırılmır.
Ölkə.Az xəbər verir ki, ölkə başçısı Rusiyanın "RİA Novosti" media qurumuna müsahibəsi zamanı bu barədə məlumat verib. Prezident növbədənkənar seçkilər barədə gəzən şayələri təkzib edib və növbəti prezident seçkilərində iştirakı barədə danışmağın tez olduğunu bildirib.
26 sentyabr tarixində Azərbaycanda konstitusiya dəyişiklikləri ilə bağlı referendum keçirildi. Ölkənin əsas qanununa edilən dəyişikliyə əsasən, prezidentin səlahiyyət müddəti 5 ildən 7 ilə qədər artırıldı. Vitse-prezident postu təsis edildi və eyni zamanda millət vəkili və dövlət başçısı seçimlərində qoyulan yaş həddi aşağı salındı. Seçililərin 25 %-dən çoxu iştirak etdiyi üçün referendum baş tutmuş sayıldı. Exit Poll-un nəticələrinə əsasən, seçicilərin 88.5 %-i dəyişikliklərin lehinə səs verdi. Ekspertlər isə referendumdan sonra nəticələrə əsasən növbədənkənar prezident seçkilərinin keçiriləcəyi barədə fikir bildirdilər.
"Bizim prezident seçkilərinin vaxtını dəyişmək fikrimiz yoxdur. Mən Azərbaycanda və onun sərhədlərindən kənarda hansı söhbətlərin getdiyini bilirəm. Belə bir plan yoxdur və buna ehtiyac görmürəm. İki il sonra baş tutacaq prezident seçkilərində iştirak edib-etməyəcəyimlə bağlı deyə bilərəm ki, hələ hansısa nəticə çıxarmaq və ya qərar vermək üçün kifayət qədər vaxtım var. Əgər xalqın dəstəyini bu gün hiss etdiyim kimi yenə də hiss etsəm, bu etibarı doğrultmağa çalışacam"-deyə prezident bildirib.
Azərbaycan dövlət başçısı qeyd edib ki, keçirilən referendum bir neçə baxımdan səciyyəvi idi: "Birincisi, 2016-cı il Azərbaycan üçün iqtisadi baxımdan çox ağır il oldu. Bu il biz yaxşı nəticələr əldə etsək də, ötən illərlə müqayisədə bu ən ağır il sayılır. Belə bir ildə biz Azərbaycan əhalisinin böyük əksəriyyəti tərəfindən dəstəklənən referendum keçirdik".
Cənab Əliyev qeyd edib ki, Azərbaycanı tənqid edənlər də referendumun gedişatında heç bir saxtakarlıq və qanun pozuntusu müşahidə etməyiblər: "Hətta müntəzəm olaraq bizi tənqid edən AŞPA kimi təşkilat da müşahidələrdən sonra maksimal pozitiv rəy verib və seçkilərin bütün standartlara uyğun olduğunu bildirib. Referendum zamanı cəmi 20 şikayət qeydə alınıb. 5 min seçki məntəqəsi və cəmi 20 şikayət. Bu isə demokratiyanın başqa bir göstəricisidir. Ən önəmlisi isə, 29 məsələnin həll edildiyi referendum idi. Bu referendum hakimiyyətə etimad votumu idi. Buna görə də mən Azərbaycan xalqına minnətdarlıq edirəm. Bu məni daha da ruhlandırır və doğru yolda olduğumuzu sübut edir. Biz bu yol ilə davam edəcəyik".
