Bütün erməni xalqının "petrosyanlaşdığı" an mütləq gələcək

Azərbaycan prezidenti İlham Əliyev “Sputnik” agentliyinə müsahibə verib.

Prezident müsahibədə bildirib ki, Azərbaycanın ərazi bütövlüyü məsələsində kompromis ola bilməz. Biz heç vaxt Dağlıq Qarabağa müstəqillik verilməsinə razı olmayacağıq və erməni tərəfi bunu çox gözəl bilir. Lakin yerli özünüidarəçilik məsələlərində kompromis mümkündür. Əgər razılığa gəlsək, bu özünüidarə Dağlıq Qarabağ Muxtar Respublikası şəklində ola bilər. Bundan artıq kompromisə gedə bilmərik.

Prezidentin bu bəyanatından sonra bir çox erməni deputat açıqlama verərək bildirib ki, bu mümkünsüz bir şeydir.

İlham Əliyevin Dağlıq Qarabağla səsləndirdiyi fikirlər ölkə ictimaiyyətində də geniş müzakirəyə səbəb olub.

Prezidentin Dağlıq Qarabağla bağlı səsləndirdiyi fikirlə bağlı millət vəkili Zahid Oruc Ölkə.Az-a danışıb:

"Ölkə başçısının Dağlıq Qarabağa yüksək muxtariyyət verilə biləcəyini bəyan etməsi bir neçə baxımdan əhəmiyyətlidir. Buna qədərki dövrdə erməni tərəfi Azərbaycanın ümumiyyətlə onlara orada yaşamaq hüququnu verməyəcəyini, ermənisiz Azərbaycan yaratmaq ideasını irəli sürürdülər. Dəfələrlə bildiriblər ki, guya biz müharibə aparırıqsa, məqsədimiz sonuncu ermənini öldürənə qədər onları məhv etməkdir. Dünyada bu fikirin keçərliliyini sübut etmək üçün Köçəryan Avropa Şurasının tiribunasından bəyan etmişdi ki, iki xalq bir-biri ilə yanaşı yaşaya bilməz. Baxmayaraq ki, bunun əksini sübut etmək üçün böyük vətən müharibəsində çiyin-çiyinə döyüşən erməni və azərbaycanlı əsgərlərdən tutmuş, başqa tarixi müştərəklilikdən də misal gətirilirdi, ancaq təəssüf ki, düşmənçilik səhnələri daha çoxdur və bu yöndən çıxış edənlərin mövqeyi çox güclüdür.

Dağlıq Qarabağın Azərbaycanda Naxçıvandan üstün səlahiyyətə malik olmasına konstitusiyamız da yol vermir. Bu əslində onlar üçün xeyli üstünlüklər deməkdir. Qarabağın indiki 180 milyona qədər olan büdcəsi Qarabağ iqtisadiyyatının əsasında formalaşmır. Bu, xarici yardımlardır, erməni milyonçularının pullarıdır və yaxud mənbəyi bəlli olmayan vəsaitlərdir. Qarabağ ABŞ konqresinin göndərdiyi vəsaitlərə göz dikməli olub.

Azərbaycan bəyan edir ki, siyasi cəhətdən hüquq bu qədər verilə bilər. Prezident İlham Əliyev bildirdi ki, Dağlıq Qarabağda müxtəlif bərpa layihələri həyata keçiriləcək. Bu o anlama gəlir ki, Azərbaycan öz ərazilərində quruculuğu ilk növbədə öz gücünə həyata keçirəcək. Neft kəmərləri məsələsində vaxtilə müxtəlif layihələr olmuşdu. Bizim dövlətin baxışı ondan ibarətdir ki, münaqişə tənzimlənəcəyi təqdirdə Qarabağdan müxtəlif neft kəmərləri keçə bilər. Bu həm gələcək müharibələri istisna edər, orada yaşayan əhalinin təhlükəsizliyinə mühüm qarantiya yaradar, həm də ermənilər tam əmin olar ki, Azərbaycan bu regiona, əhalinin tərkibindən asılı olmayaraq hər kəsə öz vətəndaşı kimi yanaşır və o bölgənin inkişafında da maraqlıdır.

70-ci illərdə Heydər Əliyev ermənilərin seperatizminin qarşısını almağa çalışarkən o bölgənin xüsusi inkişaf planlarını işləyib hazırlamışdı. Həmin region müəyyən bir sosial, iqtisadi parametrlərinə görə önə keçmişdisə, bu heç də ermənilərin qoçaqlığından, azərbaycanlılardan daha yaradıcı millət olması ilə bağlı deyildi. Qeyd etdiyimiz kimi, o regionun həssas bölgə olmasını nəzərə alıb işlər görülmüşdü.

Bundan sonra ikinci erməni dövlətinin yaradılmasına təşəbbüs göstəriləcəksə, bu o deməkdir ki, seperatizm İranın içərisinə yeriyəcək. Bizim qonşu dövlətlərdən hansısa biri irəli durub siyasi tanıtım üçün addım atmaq istəsə bu əks effekt verəcək və öz içərilərinə doğru yayılacaqdır. İran Qarabağın müstəqilliyinin tanınmasına heç bir halda gedə bilməz. Etnik tərkibinə görə zəngin olan bir ölkə çox ciddi toqquşmalara və parçalanmalara məruz qala bilər. Rusiya üçün də eyni fikiri söyləmək mümkündür. Şimali Qafqaz Qarabağın ardınca müstəqilləşmək hərəkatını dərinləşdirəcəkdir. Bu məsələni əldə saxlamaq, idarə etmək regionu bu vasitə ilə nəzarətində saxlamaq ayrı bir siyasətdir, ancaq Qarabağın gerçəkdən müstəqil erməni dövləti kimi zühur eləməsi və onun bölgə dövlətləri ilə hər hansı diplomatik siyasi, iqtisadi əlaqələr qurması qeyri-mümkün olacaq. Dağlıq Qarabağın Azərbaycandan kənar bağları yoxdur. Hətta ermənilər ağıllarında tutduğu xəyali dövləti bərqərar etsələr də, kənar məkana coğrafi əlaqələri mövcud deyil. Kəlbəcər və Laçın bütövlükdə azərbaycanlıların yaşadığı bölgələr olaraq yenə də erməniləri əhatə edirlər. Ona görə də, bu məsələdə erməni idieoloqları mümkün qədər düzgün seçim edə bilmişdilər. Stepan Şamiyan və digər 26 Bakı komissarlarının tərkibində olanlar o zaman da söyləmişdilər ki, Bakı ilə düzgün əlaqə qurmadan, Azərbaycanla normal yaşamağın formunu tapmadan onların gələcəyi yoxdur. Hesab edirəm ki, ölkə başçısı Azərbaycan konstitusiyasını dəyişmədən, Qarabağı bu dövlətin dağıdılma mexanizminə çevirmədən mühüm bir formulanı irəli sürüb. Ona qarşı ermənilər tərəfindən reaksiyalar verildi. Erməni deputatlar İlham Əliyevin fikrinin qəbulolunmazlığını söyləyirlər.

Azərbaycan 50 il sonra əhalisinin sayına görə, iqtisadi potensialına görə daha irəlidə olacaq, ancaq ermənilər haqqında bunu söyləmək mümkün deyil. Belə olan təqdirdə Azərbaycanla savaşmaq qətiyyən mümkün olmayacaq. Qarabağ məsələsini Göyçə məsələsi ilə eyniləşdirmək mümkün deyil. O zamanı tarix və coğrafiya fərqli bir mənzərəni yaradır. Azərbaycan üçün Qarabağda ermənilərin ideoloq saydıqları liderləri məhv etmək mümkün olsa, sadə erməni xalqı bizimlə bərabər yaşamağa hər zaman hazırdır.

Qarabağ məsələsini ermənilərin tarixən düşündüyü kimi Göyçə, Zəngəzur məsələsi ilə ona görə eyni yerə qoymaq olmayacaq ki, bu gün Azərbaycan müstəqil bir dövlətdir. Sovet illərindən fərqli olaraq bu belədir. Hər zaman da bizim böyük Azərbaycan quruculuq planımız olacaq. Ermənilərin Qarabağda dövlət qurması qeyri-real, qeyri-mümkündür. Özləri də buna inanmırlar. Petrosyan kimi biri bunu dərk etdisə, bütün erməni xalqının Petrosyanlaşması mütləq gələcək.

Qarabağ vaxtilə erməniləri birləşdirirdisə, indi ayırır. Qarabağ vaxtilə erməni dövlətinin formalaşması üçün rol oynayırdısa, indi ona zərbə vurur".

Səxavət Məmməd
Ölkə.Az