Partlayışda yaralanan neftçilərdən yeni

Dövlət Neft Şirkətinin neft meydançasında baş vermiş dəhşətli qəzada yaralanan neftçilərin əksəriyyəti sabah xəstəxanadan evə buraxılacaq.

Bu məlumatı Mərkəzi Neftçilər Xəstəxanasının Təcili Tibbi Yardım şöbəsinin müdiri Raud Əsədov verib.

Şöbə müdiri bildirib ki, oktyabrın 23-də xəstəxanaya 17 yaralı gətirilib. Onlardan 10-nu ambulator müayinədən sonra evə buraxılıb. 7 nəfər isə hazırda xəstəxanada stasionar müalicə alır.

R.Əsədovun sözlərinə görə, yaralı xəstələrdən yalnız 3-nün vəziyyəti digərlərinə nisbətən ağır olub. Bu xəstələr kəllə-beyin silkələnməsi və sıxılma sindromu ilə xəstəxanaya yerləşdiriliblər. Lakin onlara göstərilən tibbi yardımdan sonra hazırkı vəziyyətləri yaxşıdır. Neftçilərin əksəriyyəti sabah evə buraxılacaq.

Hazırda xəstəxanada olan neftçilər bunlardır: Anar Nurəliyev, Babaverdi Rəfiyev, Ruslan Veysəlov, İlham İbrahimov, Ağaşirin Məmmədov, Lütfəli Əliyev və Şəhriyar Vəkilov.

Qeyd edək ki, oktyabrın 23-də saat 12:00 radələrində “Azneft” İstehsalat Birliyi N.Nərimanov adına Neft və Qazçıxarma İdarəsinin ərazisində yerləşən 441 saylı qəzalı meydançada təmir işləri aparılarkən uçqun baş verib.

Uçqun nəticəsində meydançada olan vaqon evcik dənizə düşüb, meydançanın üstündən keçən 700 diametrlik boru kəməri qırılıb və yanğın baş verib.

Qəza zamanı ərazidə 41 nəfər neftçi olub. Onlardan 37 nəfəri qəza xilasetmə briqadası tərəfindən ərazidən çıxarılsa da 4 nəfər dənizdə batıb.

Dənizə düşəm 4 neftçidən 3-nün cəsədi tapılıb. Lakin 1 neftçinin cəsədi hələ də tapılmayıb. (virtualaz.org)

Ölkə.Az