Gürcüstan və Ermənistan uduzdu, bəs Azərbaycan?

Cənubi Qafqaz ölkələrindən Gürcüstan və Ermənistan mübarizəyə məğlubiyyətlə başlayıb. Gürcüstan Tiflisdə İrlandiyaya 90-cı dəqiqədə buraxdığı qolla uduzub. Danimarka isə öz meydanında Ermənistana iki qolla qələbə qazanıb.

Cənubi Qafqazdan iki yığmanın məğlubiyyətinin ardınca Azərbaycan milli komandası hansı nəticəyə nail olacaq?

Bu suala sentyabrın 9-da Bakıda keçiriləcək Bolqarıstanla görüşdə aydınlıq gətiriləcək. Bolqarıstan Futbol Federasiyasının prezidenti Borislav Mixaylov deyib ki, Azərbaycan ciddi rəqibdir:

“Səfərdə hər iki komandadan sərt oyun gözləyirik. Ancaq mən sakitəm. Əsas odur ki, futbolçularımız əlinə düşən qol imkanlarından yararlansın. Komandamızın oyun stilini bəyənirəm. Səfərdə 10-12 minlik azarkeş tutumu olan stadionda oynayacağıq. Rəqibin çox həvəsli azarkeşləri var. Azərbaycan millisi asan rəqib deyil. Ancaq komandamızın yaxşı nəticə qazanacağına inanıram”.

AFFA-nın prezidenti Rövnəq Abdullayev isə milli komandamızla görüş keçirib. Qurum rəhbəri yığmamıza uğurlar arzulayıb. Abdullayev həmçinin müvafiq tapşırıq və tövsiyələrini verib.

Qeyd edək ki, sentyabrın 9-da saat 21:00-da, "Bakcell Arena"da Bolqarıstan yığması ilə Avro-2016-nın seçmə oyununu keçirəcək Azərbaycan millisi sentyabrın 5-dən etibarən Bakıda təlim-məşq toplanışındadır. (Axar.az)