İraqlı baş nazir: Mosul əməliyyatında son vəziyyət

İraqın baş naziri Haydar İbadi Parisdə keçirilən Mosul konfransında iştirak edib

Ölkə.Az xəbər verir ki, konfrans zamanı iraqlı nazir qeyd edib ki, əməliyyat planlaşdırıldığından da sürətli surətdə həyata keçirilir. Haydar İbadi Parisdəki toplantıda video konfrans vasitəsilə iştirak edib. Onun sözlərinə görə, silahlı birləşmələr sürətlə Mosula doğru hərəkət edir.

Mosulun taleyini həll etmək üçün Fransanın paytaxtı Paris şəhərində səhər saatlarında Mosul konfransı keçirilib. Bu konfransa Türkiyə, ABŞ, İraq və 20 fərqli ölkənin diplomatları dəvət edilmişdi.

Konfransın məqsədi mülki əhalinin qorunması, əraziyə humanitar yardım göndərilməsi və İŞİD-dən təmizlənən vilayətlərin idarəetmə sisteminin qurulmasına aid yaranmış problemləri həll etməkdir. Toplantını Fransa prezidenti Fransua Olland açıb.

Olland İŞİD yaraqlılarının Suriyanın Raqqa şəhərinə qaçdığına dair sübutların olduğunu söyləyib. Qruplaşmanın yenidən toplanmasının qarşısını almaq üçün hər vasitəyə əl atmaq lazım olduğunu bildirib. İŞİD terrorçu qruplaşmasının İraq və Suriyadakı ərazilərini itirdiyini diqqətə çatdıran Olland eyni zamanda bəyan edib ki, Mosul əməliyyatı təkcə hərbi hədəf olmamalıdır. Konfrans bu əməliyyata siyasi çalar da qatmalıdır. Fransa prezidenti İŞİD-ə qarşı 4 min fransalı əsgərin vuruşduğunu xatırladıb.

İbadi isə, Ramadi, Selahaddin, Diyala, Enbar və Fəllucənin azad edildiyini, qoşunların Mosula girməsinin xalq tərəfindən gözləndiyini bəyan edib. Onun sözlərinə görə, məqsəd bölgədə sülhü bərqərar etməkdir.

Hikmət
Ölkə.Az