"Türkiyə öz milli təhlükəsizliyini qorumaq üçün İraqdakı İŞİD bazalarını bombalayacaq"

Mosulun İŞİD-dən azad edilməsi üçün İraq və digər dövlətlər əməliyyat həyata keçirir.

Əməliyyatlardan əvvəl peşmərgələrin köməkçi funksiyalarını həyata keçirəcəyi deyilsə də, peşmərgə komandirləri bildirib ki, onlar tutacaqları ərazilərdən çıxmayacaqlar. Qərbin kürd dövləti yaratmaq layihəsinin bundan sonra daha da sürətlə həyata keçəcəyi bildirilir.

Mosul əməliyyatı və kürd dövləti planı barədə politoloq Zərdüşt Əlizadə Ölkə.Az-la fikirlərini bölüşüb:

"İŞİD-i heç bir dövlət tanımır. Bütün dövlətlər İŞİD-in məhv edilməsi üçün əməkdaşlıq edir. Hal-hazırda İraq dövləti Mosulu geri almaq istəyir. İŞİD-i ölkədən sıxışdırıb çıxarmaqda qərarlıdır. Bəzi dövlətlər, o cümlədən Türkiyə İraq dövlətindən icazə almadan bu əməliyyatda iştirak edəcək. Türkiyə hökuməti bildirir ki, İŞİD-in mövcudluğu onların milli təhlükəsizliyinə xələl gətirir. Ona görə də, Türkiyə öz milli təhlükəsizliyini qorumaq üçün İraqdakı İŞİD bazalarını bombalayacaq.

Hadisənin hüquqi tərəfi də var. Bu ondan ibarətdir ki, İraq hökuməti onun ərazisini işğal etmiş terrorçu qruplaşmaları öz ərazisindən vurub çıxarmaq istəyir. Bu işdə peşmərgələr də İraqa kömək edir. Peşmərgə komandiri deyib ki, tutduğumuz ərazilərdən çıxmayacağıq. Adətən kiçik xalqların, qeyri-rəsmi dövlətlərinin nümayəndələri həddindən artıq ötkəm danışırlar, ancaq sonradan həyat onları geri çəkilməyə məcbur edir.

Əgər İraq hökuməti Mosul üzərində nəzarəti bərpa etsə, bu, rəsmi Bağdadın böyük uğurudur. Düşünürəm ki, bu, İŞİD-in böyük məğlubiyyəti olacaq. İŞİD-in tutduğu şəhərlərə İraq, Suriya, ABŞ, Rusiya, Türkiyə kimi dövlətlərin koalisiya ordusu hücum edir.

Düşünürəm ki, İŞİD uzun müddət duruş gətirə bilməyəcək. İŞİD dövlət formasında gizli terrorçu təşkilata çevriləcək".

Hazırki zamanda kürd dövlətinin yarana biləcəyi məsələsinə gəldikdə isə politoloq bildirdi ki, bu, Qərb dövlətlərinin proyektidir.

"ABŞ-ın siyasətçiləri özləri deyir ki, iri dövlətlər olmasın, çoxlu xırda-xırda dövlətlər olsun və onlar hamısı ABŞ-dan kömək istəsinlər. Böyük dövlətlər ABŞ üçün təhlükədir. SSRİ dağılanda ABŞ bayram etdi. Kürdlərin böyük hissəsi kürd dövlətinin yaranmasını istəyir. Kürd dövlətinin yaranmasını istəməyən dövlətlər Türkiyə, İran, Suriya və İraqdır. Kürd dövləti yaransa bu 4 dövlətin ərazisində yaranacaq. Buna görə kürd dövləti ideyası bu 4 dövlətin müqaviməti ilə rastlaşır. Bu müqavimət çox güclüdür. Şimali İraq kürd muxtariyyəti Səddam Hüseynin vaxtında da mövcud idi. Artıq Türkiyə Bərzaninin rəhbərlik etdiyi muxtariyyəti öz nüfuz dairəsinə sala bilib. Şimali İraq kürd muxtariyyəti Türkiyə üçün böyük təhlükə deyil. Türkiyə üçün böyük təhlükə Suriyadakı və İrandakı kürdlərdir. Hələkik Türkiyə bölgədəki proseslərə nəzarət edə bilir və özünü kifayət qədər qoruya bilir".

Səxavət Məmməd
Ölkə.Az