"Əgər Əsəd bir Türkiyə təyyarəsini vursa, bunun cavabı çox ağır olacaq"

Suriya Türkiyəni təyyarələrini vuracağı ilə hədələyib.

Suriya ordusunun verdiyi bəyanata görə, dövlətin hava sərhədlərini pozan türk qırıcılarına atəş açılacaq. Ordu komandanlığı Hələbin şimalında yerləşən Vardiya, Hassacek və Hesya əyalətlərinin bombalanmasında rəsmi Ankaranı günahlandırıb. Bombardman nəticəsində həlak olan 150 nəfər mülki sakinin ölümündə Türkiyə dövlətini ittiham edib.

Suriyada İŞİD-ə qarşı Rusiya və Türkiyə hərbi əməliyyatlar həyata keçirir. Türkiyənin məqsədi milli təhlükəsizliyini qorumaq və İŞİD-i öz sərhədlərindən uzaqlaşdırmaqdır. Suriya hökuməti də İŞİD-ə qarşı mübarizə apardığı bir zamanda Türkiyəyə qarşı bu cür bəyanat səsləndirməsi birmənalı qarşılanmır.

Suriya Türkiyə təyyarəsini vura bilərmi? Əgər bu baş versə nələr olacaq?

Bununla bağlı düşüncələrini hərbi ekspert Üzeyir Cəfərov Ölkə.Az-la bölüşüb:

"Türkiyə təyyarələrinin vurula biləcəyi təhlükəsi realdır. Aranı qarışdırmaq üçün hər şey edə bilərlər. Rəsmi Dəmşəq əgər istəyirsə ki, Suriya ərazisində stabillik olsun, bunun üçün buna şərait yaratmalıdırlar. Kimliyindən asılı olmayaraq İŞİD-i məhv etmək üçün Suriya hakimiyyəti ilə əlbir olmalıdırlar. Bu cür bəyanatlar səsləndirmək psixoloji təsir göstərməkdir. Rusiyanın xarici işlər naziri Sergey Lavrovun dediyi kimi, "Cin butulkadan çıxıb, onu geriyə salmaq artıq mümkün deyil". İŞİD-lə mübarizə başlayıb. Nə olur olsun, türklər bu məsələdə qətiyyətlidirlər və mütləq mənada istənilən addımlar atacaqlar.

Prinsip etibarı ilə Türkiyənin terrorizmlə apardığı mübarizəyə dəstək verilməlidir. Burada daha çox rəsmi Dəməşqin deyil, Türkiyənin bu proseslərdən çəkindirilməsində maraqlı olan qüvvələrin rolunu görürəm. Bu bəyanat Bəşər Əsədin istəyi yox, Türkiyəni bu mübarizədən çəkindirmək istəyən güclərin Bəşər Əsədin dili ilə demək istədiyi fikirlərdir. Türkiyənin baş naziri Binəli Yıldırım bildirdi ki, istər Mosul, istərsə də Suriya ilə bağlı məsələlərdə Türkiyəni mövqeyindən heç kim çəkindirə bilməz. Türkiyə mütləq mənada bu proseslərin içərisində olmalıdır.

Türkiyə bu hədələrə əhəmiyyət verməməlidir, ancaq ehtiyatını da əldən verməməlidir. Türkiyə nahaq yerdən öz peşəkar pilotlarını itirməməlidir. Bu məsələ Türkiyə tərəfdən də nəzərə alınır. Əgər bu baş verərsə, regionda onsuz da gərgin olan vəziyyət bir qədər də gərginləşə bilər. Orada bir ədəd Türkiyə təyyarəsi vurulacaqsa, bunun cavabı da çox ağır olacaq. Türkiyənin Suriyaya qarşı görəcəyi tədbirlər də çox amansız olacaq".

Səxavət Məmməd
Ölkə.Az