Azərbaycan aliminə yüksək etimad

Azərbaycan Respublikasının Vergilər Nazirliyinin Vergi siyasəti və strateji araşdırmalar Baş İdarəsinin rəis müavini, akademik Akif Musayev Gürcüstanın paytaxtı Tiflis şəhərində fəaliyyət göstərən Qafqaz Universitetinin illik buraxılış mərasimində iştirak edib.

Mərasimdə onun “Kadr hazırlığının iqtisadi inkişafa təsiri, peşə təhsili və bacarıqların yüksəldilməsinin, mühəndis hazırlığının innovativ iqtisadiyyatda rolu” mövzusunda çıxışı dinlənilib.

Qafqaz Universitetinin inkişafına verdiyi töhfələrə görə universitetin kollegiyası və elmi şurası tərəfindən universitetin fəxri doktoru adına layiq görülmüş Akif Musayevə universitetin fəxri diplomu təqdim olunmuşdur. “Bu ada məndən başqa iki professor: universitetinin qurulmasında böyük rolu olan və hazırda Nyu-York Universitetində dekan vəzifəsində çalışan Fenvik Has, eləcə də humanitar elmlər üzrə professor Alan Qudman da layiq görülmüşdür”, - A.Musayev bildirmişdir.

Onun sözlərinə görə, indiyə kimi bir çox diplomları olub və diplomların hər biri onun üçün xüsusi əhəmiyyət kəsb edir: “Bu diplom da mənim üçün çox önəmlidir və mənə göstərilən bu diqqəti çox yüksək dəyərləndirirəm. Universitetin fəxri doktoru olaraq gələcəkdə məruzə və mühazirələrlə çıxış edəcəyəm. Müəyyən konfransların keçirilməsi, kadr hazırlığı, kadr mübadiləsi və s. sahələrdə əlaqələrimiz davam edəcək. Onu deyim ki, bu işlərdə vergi orqanı əməkdaşı kimi deyil, bir professor olaraq iştirak edirəm”.

A.Musayev qeyd etmişdir ki, Qafqaz Universiteti Gürcüstanın təhsil sistemində nüfuslu yer tutur. Universitet biznes, inzibatçılıq, maliyyə, menecment və s. üzrə ixtisaslaşıb. Son vaxtlar isə səhiyyənin idarə olunması, hüquqşünaslıq ixtisasları üzrə də kadr hazırlığı həyata keçirilir. Xarici təşkilatların nümayəndəlikləri, banklar və s. qurumlar universitetin hazırladığı kadrlara böyük maraq göstərirlər: “Bu təhsil ocağı dünyadakı nüfuzlu universitetlərin proqramı üzrə kadr hazırlığı aparır. Beynəlxalq təcrübədə məlum olan bakalavr, magistr, doktor, fəlsəfə doktoru səviyyəsində kadr hazırlığı tam mənimsənilib. 50-dən çox xarici ölkə universiteti, o cümlədən də Azərbaycanda fəaliyyət göstərən “Azərbaycan” Universiteti ilə əlaqələri var. Bu əlaqələrin qurulmasında mənim də rolum olub. Qafqaz Universiteti ilə əlaqələr qurulandan sonra müəllim, tələbə, proqram mübadiləsi kimi işlər həyata keçirilib. Öz müəllimlərimizi Qafqaz Universitetinə təkmilləşməyə göndərdik. Onların yüksək səviyyəli professorları Azərbaycan Universitetində qısa müddətli kurslar keçirib.

Qafqaz Universiteti ilə əlaqələr bu gun də davam edir”.

Hikmət
Ölkə.Az