Razi Nurullayev "Bankları cəngəllik qanunları ilə idarə edib, milyardları xaricə çıxarıblar"
“Bir dəfə maraqlı bir şərh oxumuşdum -“Manat üzə bilir ki, onu sərbəst şəkildə üzməyə göndərəsən... Təbii ki, batacaq”. İndi Milli Bank, inzibati yolla bazar qanunları yaradır. Gah məzənnə artır, sonra isə yenidən başlayır aşağı yenməyə. O qədər yenir ki, hər kəsdə bir ümid yaranır - "bəlkə də qaytardılar". Bu bir oyundur. Milli Bank, görüntü yaradır ki, giya milli valyutamız üzür, qabağa çıxır, sürət yığır, birdən dollar gücünü toplayıb, gəlib bunu tozanağda qoyur. Bazar iqtisadiyyatı və üzən məzənnə oyunu oynamaq lazım deyil, reallıqla yaşasaq, gələcəyimiz daha ümidli olmazmı? İqtisadi oyunları qurtarın!”
Bu sözləri Ölkə.Az-a Azərbaycan Xalq Cəbhəsi partiyasının sədri razi Nurullayev deyib. O bildirib ki, manatı bu günə salanlar var və onlar hələ də əllərini və qollarını yanlarına salayaraq sərbəst gəzirlər:
“Bankları cəngəllik qanunları ilə idarə edib və milyardları xaricə çıxarıblar. Bir yığın məmur ordusu da milyonları, milyardları xaricə ötürüb. Tutub hamısını güzəşt etmədən içəri atmaq lazımdır. Gedər-gəlməzə. Ta o zamana ki, gizlətdiklərini də üzə çıxarıb əsl sahiblərinə - xalqa qaytarsınlar.
Bunun üçün dünyada işlənmiş bir praktika var. Hər kəs azadlığını pulla ala bilər. Bunu Azərbaycan hakimiyyəti də edir, amma onlar da cəngəllik qanunları ilə. Bunu xalqın gözü önündə və qanunların təsbiti ilə həyata keçirmək lazımdır. Məsələn deyək ki, bir məmur, vəzifəli şəxs, biznesmen və digərləri sübut olunur ki, 100 milyon dollar ziyan vurub, oğurlayıb, çapıb-talayıb və iqtisadiyyatı böyrü üstə qoyub. Ehtimal da var ki, sübut olunmayan 100 milyon da oğurlayıb. Qızıl orta 150 milyon dollar müəyyən edilir və o günahlandırılan şəxs 150 milyon dolları ödəyib azadlığına qovuşur. Təbii ki, hər kəs törətdiyi ağır cinayətlərə görə cavab verməlidir. Söhbət adam oğurluğu, qanlı cinayət və digər buna bənzər əməllərdən gedir”.
Razi Nurullayev ölüm hökmünün ilə bağlı referendum keçrilməsindən yana olduqlarını qeyd edib:
“Başqa bir təklifim də var. Ağır cinayətkarlar ağır cəzadan kənar qalmamalıdır ki, başqalarına da dərs olun. Düşünürəm ki, ölüm hökmünün bu və digər şəxslərə tətbiq olunması ilə bağlı referendum keçirilə bilər. Ölüm hökmünü geri qaytarmırıq, amma ağır cinayətlər törətmiş adamlar haqqında ölüm referendumu keçiririk. Bu vacibdir. Mən hakimiyyətə gəldiyim an, heç düşünmədən bunun həyata keçirilməsi üçün əlimdən gələni ardıma qoymaram. Millətin, cəmiyyətin təmizlənməsi və hərkəsin qanunlardan qorxması üçün bu lazımdır. Nəticə üçün qurban vermək lazımdır və bu qurbanlar verilməlidir”.
