Kinoşünas alim “Bacanaqlar” və “Qız atası” seriallarını çəkənləri sərt tənqid etdi
“İndi Azərbaycan telekanallarında yayımlanan “Bacanaqlar”, “Qız atası” və digər bu kimi bayağı kinoları serial hesab etmirəm”.
Bu fikirləri Ölkə.Az-a açıqlamasında Azərbaycan Milli Elmlər Akademiyasının (AMEA) müxbir üzvü, kinoşünas alim Aydın Kazımzadə bildirib.
A.Kazımzadə deyib ki, “Bacanaqlar”, “Qız atası” və digər bu kimi bayağı kinolar nə serial, nə də film deyil:
“Sadəcə olaraq burada qadın və kişilərin qışqırığı, dava-dalaşı səhnələşdirilir. Adam baxanda da xəcalət çəkir. Bu şoudur. Şounun isə kinoya heç bir aidiyyatı yoxdur. Ona görə də mən bunları kino hesab etmirəm. Bu cür çəkilənlər nə kino, nə də serial deyil. Sadəcə olaraq lağ-lağadır. Bəzən baxırsan ki, serialları süni şəkildə uzadırlar. Ortada bir şey yoxdur, ancaq serial uzana-uzana gedir. Bir də kinoda ritm olmalıdır. Kinoda, serialda ritm olmayanda elə bil küçədə hansısa hadisəyə baxırsan. Filmin öz dili var, azərbaycanlı rejissorlar isə həmin dilə düşə bilmirlər. Çox təəssüf ki, bu gün Azərbaycanda çəkilən teleserialların bir çoxu tamaşaçını qane etmir. İndi çəkilən serialların bir çoxu narkomanlığı, xuliqanlığı, oğurluğu, quldurluğu təbliğ edir. Bu gün bizə narkoman lazım deyil. Əksinə, igidliyi, vətənpərvərliyi aşılamaq lazımdır. Əksər telelanallar həmin narkomanlığı, oğurluğu, quldurluğu təbliğ edən filmləri efirə verir.
Bəzən Azərbaycan kanallarında yayımlanan seriala baxırsan, həmin filmdə bir gəlini getdiyi evdə bədbəxt edirlər, o da evdən qaçır. Yəni, bu cür ideyalı və mövzulu seriallar bizə lazım deyil. Bu mövzulu seriallar Azərbaycan cəmiyyətinə ancaq ziyan verir. Seriallar insanları maarifləndirməlidir, düzgünlüyə dəvət etməlidir. Dövlət tərəfindən Azərbaycanda milli serialların çəkilişinə vəsait ayrılanda da məhz məqsəd bu olub. Cənab Prezident İlham Əliyev bu sahəyə milyonlarla vəsait ayırıb. Ölkə başçısı bu pulu ona görə ayırıb ki, Azərbaycanda xalqı maarifləndirən, cəmiyyətə faydalar verən milli seriallar çəkilsin. Bu gün ölkədə hava soyuqdur, yağış yağır. Ancaq cəbhədə düşmənlə üz-üzə dayanan mərd hərbçilərimiz var. Həmin igid oğullar belə seriallara baxanda, ondan hansı örnəyi götürə bilər? Fikirləşəcək ki, mən burada onları qoruyuram, ancaq çəkdikləri seriallara baxın. Əminəm ki, onlar da bunu deyirlər. Ona görə də mən Azərbaycanda çəkilən bir sıra bayağı mövzulu serialların çəkilməsinin əleyhinəyəm”.
A.Kazımzadə qeyd edib ki, indi ssenarilərin yazılması işi də çox bərbad haldadır:
“Mənim yoldaşım tibb bacısı olub, bu sahədə 50 ildən çox çalışıb. İndi isə pensiyadadır, yaşlı adamdır. Hərdən o da seriallara baxanda deyir ki, bu yalandır axı, bu yerdə belə ola bilməz və sairə. Əminəm ki, Azərbaycanda əksəriyyət, hətta kinodan xəbərsiz olan insanlar belə indi çəkilən filmlərin bu cür qeyri-peşəkar olduğunu çox rahat anlayır. Filmlərdə süni sujetlər qururlar ki, seriyalar uzansın”.
Kinoşünas alim bir sıra bayağı seriallara tanınmış aktyorların rola çəkilməsindən də təəssüfləndiyini söyləyib:
“Çox təəssüf ki, bu seriallarda Azərbaycanın tanınmış xalq artistləri də rol alırlar. Mən bundan böyük təəssüf hissi keçirirəm. Hətta, bir dəfə mən rəhmətlik Yaşar Nuriyə dedim ki, axı sənin kimi qocaman aktyorun o seriallarda çəkilməsi düzgün deyil idi axı. Bu sizə ayıb idi. O da dedi ki, bir səhv idi, oldu. Görünür, onun bu seriallara çəkilməsi maddi məsələlərə görə olmuşdu”.
A.Kazımzadə vurğulayıb ki, indi Azərbaycanda peşəkar aktyor və rejissorlar da var:
“Hazırda bizim Rövşən İsax adlı talantlı rejissorumuz var. İndi onun çəkdiyi seriallar çox məntiqli və peşəkardır. İndi onun çəkdiyi “Vicdan haqqı” serialı da efirdə yayımlanır. Rövşən İsax çox savadlı rejissordur. O, “Aktrisa” adlı bədii film də çəkib. Həmin film sənət baxımından da çox yüksək səviyyədə çəkilib. Digərlərində isə zərrə qədər peşəkarlıq yoxdur”.
Zaur Əziz
