Fuad Poladovun "Azdrama"dan getməsini alqışlayanlara

Türkiyədə yaşayan tanınmış azərbaycanlı aktrisa, əməkdar artist Məlahət Abbasova xalq artisti Fuad Poladovun Dövlət Akademik Milli Dram Teatrından getməsinə münasibət bildirib.

Ölkə.Az-ın məlumatına görə, aktrisa Poladovun teatrdan getməyini alqışlayanları sərt şəkildə qınayıb:

"Bir çox saytlarda Fuad Poladovun teatr daxilindəki bəsit qalmaqaldan ötrü "Azdrama"dan getdiyini oxuyuram. Dahi, xalqın qəlbində taxt qurmuş bir aktyorun bəsit bir məsələdən ötrü teatrdan getməsini alqışlayanları başa düşmürəm. Səhnəmiz, teatrımız, tamaşalarımız, tamaşaçılarımız yetim qaldı. Bunumu alqışlayırsınız? Bizim səhnələrdə neçə dənə Fuadımız var? Çoxu dünyasını dəyişdi. Həyatda qalanlar da o qədər azaldı ki... Və ən dəhşətlisi gedənlərin yeri doldurulmadı. Bu gedişatla uzun illər də doldurulmayacağını düşünürəm. Əlimizdə qalan bu nadir aktyor və aktrisaların teatrdan getməsini necə alqışlaya bilirsiniz? Safura İbrahimova, Zərnigar Ağakişiyeva və bir çox böyük aktyorlar küsüb getdilər. Hər kəs alqışladı. Nəyi alqışlayırsınız və neçə gün alqışladınız? Üç gün! Sonra hamısı unudulub getdilər. Heç indi harada olduqlarını bilən yoxdur, nə edirlər? Səhnəmizin ulduzları əlimizdən tək-tək sürüşüb gedir, siz isə alqışlayırsınız. Yenə biz itirmirikmi, səhnəmiz itirmirmi, tamaşalarımız və tamaşaçımız itirmirmi? Üç gün sonra hər şey unudulub gedəcək".

M.Abbasova "Azdrama"nın direktoru Azərpaşa Nemətovla Fuad Poladovun münasibətlərinə də toxunub:

"Azərpaşa Nemətov mənim müəllimim olub, çox sevdiyim, hörmət etdiyim şəxsiyyətdir. Bugünkü uğurlarımın təməlində ondan öyrəndiklərim var. Fuad müəllimlə də eyni səhnəni paylaşmışam, heyran olduğum bir aktyordur. Arada bir inciklik varsa, niyə onların arasını düzəltməyə yox, yıxmağa çalışırsınız? Onlar illərin dostlarıdır, bu gün küsüb, sabah barışacaqlar. Fuad müəllimin teatrdan getməyinin yalnız uğrunda teatrı atdığı (əgər doğrudursa) o gənc aktyora (Hikmət Rəhimov nəzərdə tutulur-red.) xeyri olar. Sənət insanları duyğusal və emosionaldırlar, hirslənib ani qərarlar verə bilirlər, iki gün sonra unudurlar. Hamının işdə, evdə problemləri ola bilər. Məgər işimizi, ailəmizi atıb gedirik? Yıxmaq üçün çalışmayın, qurucu olun. Özünüz etməyə qorxduğunuz, cəsarət etmədiyiniz bir şeyi başqasında görüncə, təkrar dönüb özünüzə baxın. Dahilər nadir insanlardır. Onların bir anlıq öfkəylə getmələrini alqışlamayın. Siz itirirsiniz, biz itiririk, teatr, tamaşaçı itirir. Onsuz da o qədər azdılar ki, heç olmasa əlimizdə qalanları qoruyaq".

Əməkdar artist sonda Fuad Poladova çağırış edib:

"Fuad müəllim, o çox sevdiyiniz, illərlə əmək verdiyiniz teatrın, tamaşaların, tamaşaçıların sizə ehtiyacı var. Lütfən geri dönün, lütfən bizi sizsiz qoymayın".

Xatırladaq ki, gənc aktyor Hikmət Rəhimovun işdən çıxarılmasına etiraz edən Poladov "Azdrama"dan getdiyini açıqlayıb.

İntiqam VALEHOĞLU
Ölkə.Az